آمریکادا بعضی سئچکی مامورلارینا شبهه‌لی مکتوبلار گؤندریلدی

نوامبر آییندا تشکیل ائدیله‌جک باشقانلیق سئچکیلرینه حاضرلانان آمریکا بیرلشمیش دؤولتلرینین ۱۷ ایالتینده، بعضی سئچکی وظیفه‌لیلرینه "شبهه‌لی" مکتوبلار گؤندریلدی.

فدرال استینطاق بوروسو (اف‌بی‌آی) ایله مکتوب تفتیش سرویسی طرفیندن سی‌بی‌اس نیوزا وئریله‌ن شرحده، "مکتوبلاردان بعضیلری بیلینمه‌یه‌ن ماده احتیوا ائدیر. مکتوبلاری گوونلی شکیلده ییغماق اوچون امنیت گوجلری اورتاقلاریمیزلا یاخین شکیلده چالیشیریق" ایفاده‌سیندن ایستیفاده ائدیلدی.

شرحده، آرالاریندا اوکلاهاما، کانزاس، تنسی، آیووا و ایندیانانین دا اولدوغو ۱۷ ایالتده وظیفه‌لی سئچکی مامورلارینا گؤندریله‌ن مکتوبلارین ساییسینی، مکتوبلارین گؤندریلمه‌سیندن مسئول شخص یا دا شخصلری و مکتوبلارین آرخاسینداکی سببی معین ائتمک اوچون آراشدیرمالارین سوردوگو ایفاده ائدیلدی.

"شبهه‌لی" مکتوبلارین گؤندریلدیگی ایالتلردن دؤردونده مسئوللار، مکتوبلاری آلدیقدان سونرا هر هانسی بیر منفی تأثیرله قارشیلاشمادیقلارینی قئید ائتدی.

تنسی ایالت کاتیبلیگیندن بیر سؤزچو، مکتوبداکی ماده‌یه دایر ائتدیکلری تهلوکه‌لی ماده تستینین منفی چیخدیغینی سؤیله‌دی.

اوکلاهاما سئچکی قورولوندان وئریله‌ن شرحده ده مکتوبون ایچینده‌کی "بیلینمه‌یه‌ن ماده‌نین" اون اولدوغونون معین ائدیلدیگی وورغولاندی.

نوامبر ۲۰۲۳ده جورجیا، نوادا، کالیفورنیا، اورگن و واشینگتونداکی سئچکی اوفیسلرینه ایچینده فنتانیل و یا باشقا ماده‌لر اولان مکتوبلار گؤندریلمیشدی.