آلمان‌داکی یانغین ایله باغلی آراشدیرما باشلادیلیب

آلمان‌دا ایکی تورکون حیاتینی ایتیردیغی یانغینلا باغلی یاندیرما شوبهه‌سی ایله آراشدیرما باشلادیلیب.

برندئنبورق ایالت ساوجیلیغینین سؤزچوسو اینقو کئچیچیان، ائبئرسوالدئه شهرینده ایکی تورکون اؤلومو ایله نتیجه‌لنن یانغیندان سونرا یاندیرما شوبهه‌سی ایله آراشدیرما باشلادیلدیغینی تصدیقله‌یه‌رک، "بیز بونون تکنیک بیر مسئله اولمادیغینی، یانغینا سبب اولان قصداً داورانیش اولدوغونو گومان ائدیریک" دئدی.

قونو ایله باغلی داها اطرافلی بیلگی وئر‌مه‌ین کئچیچیان محکمه‌-طیبی پروسه‌دورلارین تاماملانمادیغینی دا بیلدیریب.

بینانین بیرینجی مرتبه‌سینده تعمیر اولونان بربرخانادا باشلایان یانغینین ائلئکتریک قورغوسوندان باشلایابیلجه‌یی ادیعا ائدیلیردی.

هفته سونو گئجه ساعاتلاریندا فریدریخ-ائبئرت کوچه‌سینده چوخ‌مرتبه‌لی بینادا باش وئرن یانغیندا امینه چوبان و اوغلو اومود جان حیاتینی ایتیریب، ۴-او آغیر اولماقلا ۶ نفر یارالانیب.