پوتین: اوکراینین روسیه‌یه سالدیرما ایجازه‌سی وئریلمه‌سی، ناتو اؤلکه‌لرینین ساواشا قوشولماسی دئمکدیر
پوتین بیان ائدیب کی، اوکراینین روسیه اراضی‌سینه سالدیری ایجازه‌سی وئریلمه‌سی ناتو اؤلکه‌لری، آمریکا و آوروپا اؤلکه‌لرینین اوکراینداکی ساواشا قوشولماسی دئمک اولاجاق.
روسیه پرئزیدئنتی ولادیمیر پوتین بیان ائدیب کی، اوکراینین روسیه اراضی‌سینه سالدیری ایجازه‌سی وئریلمه‌سی ناتو اؤلکه‌لری، آمریکا و آوروپا اؤلکه‌لرینین اوکراینداکی ساواشا قوشولماسی دئمک اولاجاق.
پوتین "روسیه 1" دؤولت تلویزیون کانالینا آچیقلاما وئریب.
آمریکا و بؤیوک بریتانیادا گونده‌مه گتیریلن اوزاق منزیل‌لی سیلاحلارلا اوکراینین روسیه اراضی‌سینه سالدیریسینا ایجازه وئریلمه‌سی مسئله‌سی ایله باغلی سوالی جوابلان‌دیران پوتین دئییب کی، کیئو حکومتینین روسیه اراضی‌سینه سالدیریسینا ایجازه و یا قاداغان‌دان صحبت گئده بیلمز. اوکراینین اینسانسیر هاوا آراجلاری و دیگر واسطه‌لرله بونو ائده‌بیله‌جگینی سؤیله‌دی.
اوکراین اوردوسونون غرب اوره‌تیمی اولان معاصیر یوکسک دقیق‌لیک‌لی اوزاق منزیل‌لی سیستملرله سالدیری ائتمک ایمکانینین اولمادیغینا دیقیت چکن پوتین، "بو، آنجاق اوکراینین صاحب اولمادیغی اویدولاردان الده ائدیلن کشفیات معلوماتلارینین ایستیفاده‌سی ایله مومکون‌دور. بونلار یا آوروپا بیرلیگی، یا دا عمومیتله ناتو-دور. باشقا بیر اؤنملی و اساس ائلئمئنت اودور کی، سؤزوگئدن راکئت سیستملری یالنیز ناتو اؤلکه‌لرینین نیظامی پرسونلی طرفین‌دن ایداره اولونابیلر" دئدی.
پوتین، اوکراین حکومتینین روسیه اراضی‌سینه سالدیریا ایجازه و یا ایجازه وئرمه‌مه‌سینین سؤز مؤوضوعسو اولمادیغینی ایفاده ائد‌رک، "بو، ناتو اؤلکه‌لرینین موناقیشه‌ده بیرباشا ایشتیراک ائدیب-ائتمیه‌جگینه قرار وئرمکله باغلی‌دیر. بو قرارین قبولو او دئمک اولاجاق کی، ناتو اؤلکه‌لری، آمریکا و آوروپا اؤلکه‌لری اوکراینداکی ساواش‌دا ایشتیراک ائدیر. بو، موناقیشه‌نین ماهیتینی و دوغاسینی اهمیت‌لی درجه‌ده دگیشه‌جک. بو باش وئررسه، بیزه وئریلن تهدیدلره اویغون اولاراق لازیمی قرارلاری وئره‌جگیک" دئدی.
