اوکراین‌داکی ساواش‌دا 11 مین 700 سیویل هلاک اولوب

بیرلشمیش میللتلر تشکیلاتی (بمت) اوکراینداکی ساواش‌دا 11 مین 700 سیویل وطنداشین حیاتینی ایتیردیگینی بیل‌دیره‌رک، گنل قورولون 79-جو ایجلاسینا حاضیرلاشان عضو دؤولتلرین لیدرلرینی اوکراینداکی ساواشی بیتیرمک اوچون بوتون ایمکانلاردان ایستیفاده ائتمه‌یه چاغیریب.

اکوادور و فرانسه‌نین طلبی ایله بیرلشمیش میللتلر تشکیلاتی تهلوکه‌سیزلیک شوراسین‌دا روسیه‌نین اوکرایندا سیویل اهالییه و سیویل آلت‌یاپیلارا سالدیریلاری ایله باغلی ایجلاس کئچیریلیب.

بیرلشمیش میللتلر تشکیلاتی باش کاتیبینین اینسانی مسئله‌لر موعاوینی جویس مسویا بورادا عضو اؤلکه‌لری معلوماتلان‌دیراراق، اوکرایندا وضعیتین گئتدیکجه پیسلشدیگینی دقته چاتدیریب.

مسویا، اؤل‌نلرین سایینین آرتدیغینی و اینسانلارین عذابینین "دؤزولمز حده" چاتدیغینی، ایندی‌یه‌دک 11 مین 700 سیویل ساکینین حیاتینی ایتیردیگینی، 24 مین 600 سیویل وطنداشین ایسه یارالاندیغینی بیلدیریب.

اوکرایندا 10 میلیون اینسانین مجبوری کؤچکونه چئوریلدیگینه دقت چکن مسویا، 26 آوقوست‌دان بو یانا اوکرایننین هر یئرین‌ده گئنیش میقیاس‌لی سالدیریلارین داوام ائتدیگینی، اوکراین-روسیه سرحدین‌ده‌کی قارشی‌دورمانین یئنی بؤلگه‌لره سیچرادیغینی و بون‌دان درین ناراحات اولدوقلارینی بیلدیریب.

مسویا بیان ائدیب کی، اوکرایننین کورسک ویلایتین‌ده آپاریلان نیظامی عملیاتلار نتیجه‌سین‌ده 130 مین اینسان دیدرگین دوشوب.

مسویا بورادا دا سیویل شخصلره و سیویل آلت‌یاپیلارا قارشی سالدیریلارین ائدیلدیینه دقت چکیب، دئدی: "بوتون طرفلر بین الخالق اینسانی حقوقا اویغون اولاراق سیویل شخصلری و سیویل آکتیولری قورومالی‌دیر."

مسویا بیلدیریب کی، نیظامی فعالیتلرین آرتماسی اینسانی عملیاتلاری گرگینلشدیریر و ایشچیلری تهلوکه آلتینا آلیر.

بو ایل اوکراین اوچون آچیق‌لانان اینسانی یاردیم فوندونا 1.4 میلیارد دوللار یاتیریلدیغینی بیل‌دیر‌ن مسویا، بونون غیری-کافی اولدوغونو و اوکراین ایچین‌ده 14.6 میلیون اینسانین یاردیما احتیاجی اولدوغونو بیلدیریب.

مسویا بیرلشمیش میللتلر تشکیلاتی گنل قورولونون 79-جو ایجلاسسینا حاضیرلاشان عضو دؤولتلرین لیدرلرینی اوکرایندا ساواش‌ا سون قویماق اوچون بوتون ایمکانلاردان ایستیفاده ائتمه‌یه چاغیریب.