ترامپ و هریس جانلی وئریلیشده قارشی قارشییا گلدی

آمریکا بیرلشمیش دؤولتلری باشقانلیق یاریشیندا کامالا هریس ایله دونالد ترامپ، جانلی وئریلیشده ایلک دفعه دارتیشدی.

آمریکا‌دا ۵ نوامردا ائدیله‌جک جمهورباشقانی سئچکیلری اوچون گئری ساییم سوررکه‌ن، دموکرات نامیزد هریس ایله جمهوریتچی نامیزد ترامپ، ای‌بی‌سی نیوز کانالیندا نشر اولونان و تخمیناً ۱،۵ ساعات داوام ائد‌ن جانلی وئریلیش دارتیشما پروگرامیندا دانیشدی.

پروگرامدا نامیزدلر اقتصاد‌دان، خاریجی سیاسته فیکیرلرینی آچیقلادی، بیر چوخ مؤوضوعدا بیر بیرلرینی گوناهلاندیردی.

کامالا هریس، ایسرائیلین قیرغینلاری مؤوضوعوندا،

"ایسرائیلین اؤزونو مدافعه حاقی وار، اونلارا اؤزونو قوروما مؤوضوعوندا دستگیمیز سوره‌جک اما چوخ چوخ گوناهسیز اؤلدورولدو، ساواش درحال سونا چاتمالی" دئدی.

ترامپ ایسه،

"هریس نتانیاهودان نیفرت ائدیر، من اولسام، ایران بؤلگه‌ده‌کی اؤلکه‌لره مادی دستک تامین ائده بیلمزدی، ایسرائیلده بونلار یاشانمازدی" ایفاده‌سیندن ایستیفاده ائتدی.

اؤته یاندان، ترامپ، وظیفه‌یه گلیر گلمز اوکراینا روسیا ساواشینی بیتیرجگینی، اوچونجو دونیا ساواشینین قاپیدا اولدوغونو ایفاده ائتدی.

هریس ایسه،

"ترامپ باشقان اولسا پوتین کیئوده اوتورار، گؤزونو دیگر آوروپا اؤلکه‌لرینه تیکردی" دئدی.

ایکی رقیبی ایلک دفعه قارشی قارشییا گتیره‌ن جانلی وئریلیشده ترامپین جمعی ۴۲ دقیقه ۵۲ ثانیه، هریسین ایسه ۳۷ دقیقه ۳۶ ثانیه دانیشدیغی قئید ائدیلدی.

اؤته یاندان جانلی وئریلیشین آردیندان ایکی طرف ده اؤزلرینین گئجه‌نین غالیبی اولدوغونو آچیقلارکه‌ن، سالونون خاریجینده تو‌لانان دموکراتلارلا جمهوریتچیلر آراسیندا قالماقال یاشاندیغی بیلدیریلدی.