پاپا آسیا تورو چرچیوه‌سین‌ده ایندونزیادادیر

کاتولیکلرین روحانی لیدری و واتیکانین پرئزیدئنتی پاپا فرانسیس 12 گونلوک آسیا تورونون ایلک دایاناجاغی ایندونزیادادیر.

پاپا ایندونزیایا دونن باشلایان سفری چرچیوه‌سین‌ده مردکا سارایین‌دا پرئزیدئنت جوکو ویدودو و دیگر ایندونزیا مقاملاری ایله گؤروشوب.

ویدودو گؤروشمه زامانی پاپایا فیلیسطینه و فیلیسطین خالقینا وئردیگی دسته‌یه گؤره تشککور ائدیب.

ساواش‌ین هئچ کیمین ماراقلارینا خیدمت ائتمیه‌جگینی ایفاده ائد‌ن ویدودو، "ساواش سیویل اهالییه آنجاق بدبخت‌لیک و آغری گتیریر" دئدی.

ویدودو اینسانلارین فیکیر آیری‌لیقلارینین تقدیر ائدیلمه‌لی اولدوغونو وورغولایاراق، باریش و داها یاخشی بیر دونیایا چاغیریب.

فرانسیس ایسه ایندونزیانین کولتورل موختلیف‌لیگینین "هر حیسه‌سی دگیش‌دیریله بیلمه‌ین موکممل بیر موزایکا" میدانا گتیردیگینی ایفاده ائتدی.

پاپا جاکارتانین باش کیلسه‌سین‌ده خریستیان دین خادیملری ایله ده گؤروشوب.

سون 35 ایلده ایندونزیایا سفر ائد‌ن ایلک پاپا اولان فرانسیس، 1970-جی ایلده پاپا 6-جی پاوئل و 1989-جو ایلده پاپا 2-جی ایوان پاوئل‌دن سونرا ایندونزیایا سفر ائد‌ن اوچونجو پاپا اولدو.

سپتامبرین 5-ده جنوب-شرقی آسیانین ان بؤیوک مسجیدی اولان جاکارتاداکی ایستیقلال مسجیدینی زیارت ائد‌جک پاپا اؤلکه‌ده‌کی کاتولیکلرله ده گؤروشه‌جک. همین گون پاپا عینی زامان گئلورا بونگ کارنو ایستادیونون‌دا مؤهتشم میتینگ کئچیره‌جک.

پاپا سپتامبرین 6-دا جاکارتادان آیریلاراق پاپوا یئنی گینه‌یه گئتمه‌لی‌دیر.

پاپانین آسیا ساکیت اوقیانوس بؤلگه‌سی 12 گونلوک تورو چرچیوه‌سین‌ده شرقی تیمور و سنگاپورا سفر ائده‌جگی گؤزلنیلیر.