مکرونون عزلی اوچون ۱۸۶ میندن چوخ ایمضا توپلاندی

فرانسادا جمهورباشقانی امانوئل مکرونون عزل ائدیلمه‌سینه باغلی ۱۸۶ میندن چوخ ایمضا توپلاندی.

سولچو یئنی خالق جبهه‌سی اتفاقینین ائرکه‌ن عمومی سئچکیلرده میللی مجلیسده ان چوخ کورسونو الده ائتمه‌سینه باخمایاراق سول اتفاقدان بیر باش ناظیر تعیین ائتمه‌یی رد ائد‌ن جمهورباشقانی مکرونون عزل ائدیلمه‌سی اوچون ایمضا کمپینی باشلادیلدی.

سولچو بویون ایمه‌یه‌ن فرانسا پارتیسی مجلیس باشقان کؤمکچیسی کلمنس گیت، اکس حسابیندان ائتدیگی پایلاشیمدا، آنلاین موحیط‌ده پایلاشیلان عریضه‌نین "ایندیدن هاراداسا ۲۰۰ مین آدام طرفیندن ایمضالاندیغینی" بیلدیردی.

گیت، فرانسالیلاری جمهورباشقانی مکرونون عزل ائدیلمه‌سینی طلب ائد‌ن عریضه‌نی ایمضالاماغا چاغیردی.

عریضه‌ده، مکرون سئچکی نتیجه‌لرینه باخمایاراق "کؤهنه حکومتین وظیفه‌سینی داوام ائتدیرمه‌سینه ایجازه وئردیگی و اؤز پروقرامی خاریجینده‌کی بوتون حکومت پروقراملارینین تطبیق اولونماسینا مانع تؤرتدیگی" سببی ایله تنقید اولوندو.

مکرونون سئچکیلرین اوزریندن گئچه‌ن ۲ آیدا هله بیر باش ناظیر تعیین ائتمه‌میش اولماسینین تنقید اولوندوغو و ۱۸۶ میندن چوخ آدامین ایمضالادیغی عریضه‌ده، "پارلامنتر رژیملر و تمثیلی دموکراسی سیستمینده بو اوتوریتر گئدیشین بنزرینین اولمادیغی" قئید ائدیلدی.

بویون ایمه‌یه‌ن فرانسا پارتیسی طرفیندن ۳۱ آگوستدا جمهورباشقانی مکرونون عزل ائدیلمه‌سینه ایستیقامتلی تکلیف میللی مجلیسه تقدیم ائدیلمیشدی. بویون ایمه‌یه‌ن فرانسا پارتیسی، سئچکی نتیجه‌لرینی گؤز آردی ائد‌رک مکرونون وظیفه‌سینی پوزدوغونو مدافعه ائتمیشدی.

مکرون، سئچکیلرده میللی مجلیسده ان چوخ کورسونون صاحبی اولان سولچو یئنی خالق جبهه‌سینین اورتاق نامیزدی لوسی کاستتسی باش ناظیر تعیین ائتمه‌یه‌جگینی بیلدیرمه‌سینین آردیندان حکومت قورما موذاکیره‌لرینی داوام ائتدیریر.

ائرکه‌ن عمومی سئچکیلرین آردیندان میللی مجلیسین ان بؤیوک سیاسی قروپونو ۱۹۳ میللت وکیلی ایله یئنی خالق جبهه‌سی و باغلانتیلیلار میدانا گتیررکه‌ن اونو ۱۶۶ میللت وکیلی ایله مکرونون اقتدار کوالیسیونو و ۱۴۲ میللت وکیلی ایله قاناتیک ساغچی رن و اورتاقلاری ایزله‌ییر.

فرانسا آنایاساسینا گؤره، جمهورباشقانینین ایسته‌دیگی آدامی باش ناظیر تعیین ائتمه صلاحیتی وار آنجاق سیاسی عنعنه‌لره گؤره باش ناظیر، ان چوخ سس آلان پارتی یا دا اتفاقدان سئچیلیر.