هیندیستان‌دا گوج‌لو یاغیشلار: 10 اؤلو

هیندیستانین آندهرا پرادش و تلانقانا ایالتلرین‌ده داوام ائد‌ن لئیسان یاغیشلاری نتیجه‌سین‌ده 10 نفر حیاتینی ایتیریب.

ن.د.تو تلویزیونونون معلوماتینا گؤره، آندهرا پرادش و تلانگانادا سون 2 گون‌ده یاغان گوج‌لو یاغیشلار حیاتا منفی تأثیر ائدیب.

آندهرا پرادش ایالتینین ویجایاوادا منطقه سینده‌کی آمباپورام، نایناوارام، نوننا و پاتهاپادو کندلری تامامیله سو آلتین‌دا قالیب.

مسئوللار بو کندلرده یاشایان اینسانلارین خیلاص ائدیلمه‌سی و تهلوکه‌سیز اراضیلره داشینماسی اوچون آختارما- قورتارما عملیاتینا باشلاییب.

آندهرا پرادش ایالتینین ایچ ایشلر ناظیر وانقالاپودی آنیتها آچیقلاماسین‌دا دئییب:

"گوج‌لو یاغیشلار نتیجه‌سین‌ده ایندی‌یه‌دک 9 نفر حیاتینی ایتیریب. اکیپلریمیز 600 نفری قاپالی وضعیت‌ده قالدیقلاری یئرلردن خیلاص ائدیب."

آنیتها بیلدیریب کی، 5 منطقه‌ده 294 کنددن 13 مین 227 نفر تخلیه ائدیلیب.

آندهرا پرادش ایالتینین نتر بؤلگه‌سین‌ده داشقینلار سببین‌دن قاطارلارین حرکتی دایاندیریلارکن، بیر چوخ سرنیشین موختلیف ایستگاهلاردا قاپالی قالیب.

هیندیستان مئتئورولوژی ایداره‌سی (ایمد) عرب دنیزین‌ده تأثیرلی اولان آسنا سیکلونونون یاخین 24 ساعت عرضین‌ده غرب-شیمال غرب ایستیقامتین‌ده حرکت ائد‌رک هیندیستان ساحیللرین‌دن اوزاقلاشماسینین گؤزلنیلدیگینی آچیقلاییب.

آندهرا پرادش ایالتینین شیمال حیسه‌سی و اودیشا ایالتینین جنوب ساحیللرینه تأثیرینی داوام ائتدیر‌ن آسنا سیکلونو سون 2 گون‌دور گوج‌لو یاغیشلارا سبب اولوب.

تلانگانادا، هیدراباد و ایالتین دیگر حیسه‌لرینه تأثیر ائد‌ن لئیسان داشقینلارا سبب اولوب.

گوج‌لو یاغیشلاردان سونرا بعضی منطقه‌لردا دره‌لر داشیب، سئل سولاری کندلر آراسین‌دا یول علاقه‌سینی کسیب.

حاممام و نالقون‌دا منطقه‌لرین‌ده دا ائولری سو باسیب.

ماهابوب آباد منطقه‌سنده بیر نفری سئل سولاری آپاراراق اؤلوب.

تلانگانادا سوریاپئت یاخینلیغین‌دا جاده‌نین سو آلتین‌دا قالماسی سببین‌دن حیدرآباد-ویژایاوادا جاده‌سینده نقلیاتین حرکتی دایانیب.

هیندیستان مئتئورولوژی ایداره‌سی تلانقانا ایالتینین 11 منطقه‌سی اوچون "قیرمیزی آلارم" اعلان ائدیب.