غزه‌ده اوشاق فلجی علیهینه واکسیناسیون کامپانیاسی باشلاییب
بیرلشمیش میللتلر تشکیلاتینین اورتادوغوداکی فیلیسطینلی سیغینماچیلارا کؤمک و باییندیرلیق آژانسی (اونروا) غزه زولاغی‌نین مرکزینده 10 یاش‌دان کیچیک اوشاق‌لار اوچون اوشاق فلجی علیهینه واکسیناسیون کامپانیاسی‌نین ایلک مرحله‌سینی باشلاتدی.
بیرلشمیش میللتلر تشکیلاتینین اورتادوغوداکی فیلیسطینلی سیغینماچیلارا کؤمک و باییندیرلیق آژانسی (اونروا) غزه زولاغی‌نین مرکزینده 10 یاش‌دان کیچیک اوشاق‌لار اوچون اوشاق فلجی علیهینه واکسیناسیون کامپانیاسی‌نین ایلک مرحله‌سینی باشلاتدی.
اونروا-نین ایکس سوسیال مئدیا حسابیندان وئریلن پای‌لاشیمدا، بو واکسیناسیون کامپانیاسی‌نین یاخین گونلرده غزه‌نین بوتون بؤلگه‌لرینه یاییلا‌راق 600 میندن چوخ اوشاغا چاتاجاغی بیلدیریلدی. آچیقلامادا، "بؤلگه‌ده‌کی اوشاق‌لارین ریفاهی اوچون دایمی آتیشکسین واختی چاتیب" ایفاده‌سینه یئر وئریلدی.
غزه زولاغی‌نین مرکزینده مین‌لرله عائله، 10 یاش‌دان کیچیک اوشاق‌لارینی واکسن ائتمک اوچون اعلان ائدیلن مرکزلره اوز توتدو.
دونیا ساغلیق تشکیلاتی، فیلیسطین ساغلیق ناظیرلیگی، بیرلشمیش میللتلر اوشاق فوندو (یونیسف) و اونروا امکداش‌لیغی ایله غزه زولاغیندا 10 یاش‌دان کیچیک 600 میندن چوخ اوشاغی احاته ائدن واکسیناسیون کامپانیاسی باشلادیلیب.
دونیا ساغلیق تشکیلاتی، غزه زولاغی‌نین مرکزینده یئرلشن دیرالبله بؤلگه‌سینده‌کی واکسیناسیون کامپانیاسی‌نین 4 سپتامبرا قدر داوام ائدجگینی آچیقلاییب. ایسراییلین داوام ائدن هوجوم‌لارینا باخمایا‌راق، غزه‌نین جنوبونداکی خان یونیس شهرینده ده 31 آوقوست آخشامی واکسیناسیون کامپانیاسی باشلاییب.
غزه ساغلیق ناظیرلیگی‌نین سؤزچوسو اشرف القدره، فیس بوک حسابیندا ائتدیگی یازی‌لی آچیقلامادا، اونروا طرفیندن باش‌لانان واکسیناسیون کامپانیاسینا خالقین بؤیوک ماراق گؤستردیگینی ایفاده ائدیب. ناظیرلیگین آچیقلاماسیندا ایسه کامپانیانین ایلک گونونده مرکزی بؤلگه‌ده 72 مین 611 اوشاغین واکسن اولوندوغو قئید ائدیلیب.
