هیروشیمادا خاطیرلاما مراسیمینده ایسرائیله تپکی

ژاپندا آکتیویستلر، هیروشیمایا اتم بومباسی آتیلماسینین ایل دؤنومونو سببی ایله شهرده تشکیل ائدیله‌ن خاطیرلاما مراسیمینه ایسرائیلین دعوت ائدیلمه‌سینه تپکی وئردی.

فیلیسطینی دستکله‌یه‌ن تخمیناً ۱۰۰ آکتیویست، ایسرائیلین توکیو سفیری گیلاد کوهنین خاطیرلاما مراسیمینه دعوت ائدیلمه‌سینی قینادی.

فیلیسطینین ژاپن نماینده‌سی ولید سیام دا، "باریشین سمبولو" اولاراق تانیملادیغی هیروشیمادا، "غزه‌لی قوربانلارین دیشلانما‌سیندان اومودسوزلوق یاشادیغینی" دیله گتیردی.

سیام، ایسرائیلین مراسیمه دعوت ائدیلمه‌سینین هیروشیمانین تمثیل ائتدیگی عدالت قانونونا ترس دوشدوگونو وورغولادی.

آکتیویستلردن ماسائه یواسا ایسه، ایسرائیلین دعوت ائدیلمه‌سینی، قالیجی دونیا باریشینی مدافعه ائد‌ن هیروشیمانین مباریزه‌سینه "خیانت" اولاراق دگرلندیردی.

هیروشیمالی مقاملار، ژاپن حکومتی طرفیندن تانینماماسی و بیرلشمیش میللتلر عضوو اولماماسینی سبب گؤستره‌رک فیلیسطینی مراسیمه دعوت ائتمه‌میشدی.

آمریکا بیرلشمیش دؤولتلری، ۶ آگوست ۱۹۴۵ده هیروشیمایا تاریخین ایلک اتم بومباسینی آتمیش، شهرین یوزده ۹۰ی ییخیلمیش، ایلک آندا ۸۰ مین نفر حیاتینی ایتیرمیشدی. اوچ گون سونرا دا ناگاساکییه اتم بومباسی آتیلمیش، بورادا دا ان آز ۴۰ مین نفرین ایلک آندا اؤلدوگو ایفاده ائدیلمیشدی.

ایزله‌یه‌ن آیلار و ایللرده، بؤلگه‌ده رادیاسیونا باغلی خسته‌لیکلردن اؤلوملر داوام ائتمیشدی.