نیجریه‌ده یاشاییش باهالیغینا اعتراض؛ 17 اؤلو

نیجریه‌ده بنزینه وئریلن سوبسیدلرین آرادان قالدیریلماسین‌دان سونرا باهالاشان یاشاییش سوییه‌سینه قارشی اعتراضلاردا 17 نفر حیاتینی ایتیریب.

اعتراضلارین کئچیریلدیگی بعضی اراضیلرده گؤستری‌چیلرله تهلوکه‌سیزلیک قوه‌لری آراسین‌دا زوراکی‌لیق حادثه‌لری باش وئریب.

میللی مطبوعات‌دا یئر آلان خبرلره گؤره، 17 نفر حیاتینی ایتیریب، اونلارلا اینسان یارالانیب، چوخ‌لو بینالار یاندیریلیب.

اؤلکه ایچین‌ده یاشاییش باهالیغینین زوراکیلیغا چئوریلمه‌سینه قارشی بیر گون اؤنجه باشلایان اعتراضلار سببیله دونن بعضی ایالتلرده کوچه‌یه چیخما یاساغی اعلان ائدیلیب.

نیجریه جمهورباشقانی بولا احمد تینوبو 29 مای 2023-نجو ایلده نفت محصوللارینا وئریلن سوبسیدنی لغو ائتدی.

قراردان سونرا اؤلکه‌ده یاناجاغین قیمتی قالخیب.

لیتری 185 نایرایا (0.24 دولار) ساتیلان یاناجاغین قیمتینین 620 نایرایا (0.82 دولار) قالخماسی یاشاییش باهالیغینین آرتماسینا سبب اولوب.