اینگیلتره‌نین لیدز شهرین‌ده گؤستریچیلر اوتوبوس یاندیریبلار

اینگیلتره‌نین لیدز شهرین‌ده باش وئره‌ن حادثه‌لرده گؤستریچیلر پولیس اوتوموبیلینی آشیراراق ایکیمرتبه‌لی اوتوبوسو یاندیریبلار.

اؤلکه مطبوعاتین‌دا یئر آلان خبره گؤره، حادثه‌لر آخشام ساعاتلارین‌دا هرهیلز بؤلگه‌سین‌ده سوسیال خیدمت مسئوللاری بیر عائله‌نین اوشاقلارینی آپارماق ایستدیک‌لرینده باش وئریب.

توپ‌لانان ایزدیهام پولیس ماشینینین شوشه‌لرینی اوشاق آراباسی و داشلارلا سیندیریب، داها سونرا ماشینی آشیریب و ایکیمرتبه‌لی عمومی نقلیات ماشینینی یاندیریب.

باتی یورک‌شر پولیسین‌دن وئریلن آچیقلامادا، زوراکیلیغین بؤیومه‌سین‌دن اؤنجه پولیس مأمورلارینین اوشاقلاری و موسسیسه ایشچیلرینی تهلوکه‌سیز شکیل‌ده اراضی‌دن اوزاقلاشدیردیغی ایفاده ائدیلدی.

آچیقلامادا بؤلگه‌یه داها چوخ پولیس گؤندریلدیگی، بعضی یوللارین نقلیات اوچون باغلاندیغی و اهالییه اراضی‌دن اوزاق دورماغی توصیه ائدیلدیگی، خسارت آلانلارین اولمادیغی قئید ائدیلیب.

باتی یورک‌شر بلدییه باشچی‌سی تراجی برابین ده لیدز‌ده‌کی کاوسو سوسیال گرگین‌لیگی قیزیش‌دیرماق اوچون ایستیفاده ائد‌نلری "یئنی‌دن دوشونمه‌یه" چاغیردی.