بایدن: یاش یالنیز بیلگه‌لیک گتیرر

بایدن، اؤلکه‌سی اوچون "یاخشی شئیلر" ائتدیینی و "داها ائدیله‌جک چوخ شئی" اولدوغونو مدافعه ائد‌رک، نامیزدلیینی داوام ائتدیرمه نیتینده اولدوغونو سؤیله‌دی

2164586
بایدن: یاش یالنیز بیلگه‌لیک گتیرر

ذهنی و فیزیکی ساغلیغی سورغولانان آمریکا بیرلشمیش دؤولتلری باشقانی  جو بایدن، ساغلاملیغییلا باغلی طبی بیر پروبلئم معین ائدیلمه‌سی حالیندا سئچکی یاریشیندان چکیله بیلجیینه ایشاره ائتدی.

جو بایدنین، "بلک انترتاینمنت تلویزیون نیوز"آ وئردیی رئپورتاژین بیر قیسیمی یایینلاندی.

اؤلکه‌نین اؤزونه احتیاج دویدوغونا ایشاره ائد‌ن ۸۱ یاشینداکی باشقان، "یاش یالنیز بیلگه‌لیک گتیرر" دئدی.

بایدن، اؤلکه‌سی اوچون "یاخشی شئیلر" ائتدیینی و "داها ائدیله‌جک چوخ شئی" اولدوغونو مدافعه ائد‌رک، نامیزدلیینی داوام ائتدیرمه نیتینده اولدوغونو سؤیله‌دی.

آمریکادا ۵ نوامبردا ائدیله‌جک جمهورباشقانی سئچکیلری اوچون نامیزدلیکدن چکیلمه‌سینه نه‌یین سبب اولا بیلجیینین سوروشولماسی اوزرینه بایدن، "اگر طبی بیر پروبلئم اورتایا چیخارسا، دکترلار گلیب بو پروبلئمین وار دئسه اولا بیلر" مئساژی وئردی.

دیگر طرفدن، جو بایدنین یاریشدان چکیلمه‌سی اوچون دموکراتلاردان تضییق آرتماغا داوام ائدیر.

آمریکا نماینده‌لر مجلیسی عضوو دموکرات آدام شیف ده بایدنه "چکیل چاغیریشی" ائد‌نلرین آراسینا قاتیلدی.

شیف، "کمپیندن چکیلمه، باشقان بایدنین وئرجیی بیر قرار آنجاق آرتیق بایراغی تحویل وئرمه زامانینین گلدیینی دوشونوره‌م" شرحینی وئردی.

بایدنه "چکیل چاغیریشی" ائد‌ن دموکرات سایی ۲۰نی گئچدی.

بو آرادا، آغ ائو، جو بایدنین یئنی تیپ کوروناویروس (کووید-۱۹) تستینین مثبت چیخدیغینی بیلدیردی.

آغ ائو سؤزچوسو کرین ژان-پیر، بونا باغلی یازیلی شرح وئردی.

شرحده، کووید-۱۹ واکسنی اولدوغو، بو سببله یونگول علائم گؤستردیی باشقانین دلاورده اؤزونو تجرید ائدجیی قئید ائدیلدی.



ایلگیلی‌لی خبرلر