آمریکادان روسیایا شیمیایی سلاح سوچلاماسی

آمریکا بیرلشمیش دؤولتلری، روسیانی، اوکراینادا شیمیایی سلاحلاردان "ساواش آراجی" اولاراق ایستیفاده ائتمکله سوچلایاراق، بو چرچیوه‌ده ۲۸۰دن چوخ شخص و قورولوشو تحریم لیستینه علاوه ائتدی.

(آمریکا) خاریجی ایشلر باخانلیغی سؤزچوسو متیو میللر، وئردیگی یازیلی آچیقلامادا، روسیایا قارشی یئنی تحریملرینی بیلدیردی.

متیو میللر، موسکوانی اوکراینادا شیمیایی سلاحلاری ساواش واسطه‌سینه چئویرمک و بو اؤلکه‌ده ۲۰۲۲دن بو یانا سۆره‌ن ساواشدا شیمیایی سلاح "کلوروپیکرین" قوللانماقلا سوچلادی.

بونون شیمیایی سلاحلار آنلاشما‌سینین آچیق پوزونتوسو اولدوغونو ایفاده ائد‌ن میللر، "خاریجی ایشلر باخانلیغی، شیمیایی و بیولوژیک سلاحلار قانونو چرچیوه‌سینده، روسیانین اوکراینادا 'کلوروپکرین'دن ایستیفاده ائتدیگی و شیمیایی سلاحلار آنلاشما‌سینی پوزدوغو نتیجه‌سینه چاتمیشدیر" دئدی.

میللر، بو چرچیوه‌ده هم آمریکا خاریجی ایشلر باخانلیغینین هم ده آمریکا خزانه باخانلیغینین، روسیانین شیمیایی سلاح تجهیزات و محصوللارینی تامین ائتمه‌سینده رول اوینادیقلاری سببی ایله، ۲۸۰ شخص و قورولوشو تحریم لیستینه علاوه ائتدیگینی بیلدیردی.

روسیا ایسه آمریکانین بو ادعالارینی رد ائد‌رک، سؤزو گئدن آچیقلامانین اساسسیز اولدوغونو ساووندو.