آمریکالی سؤزچویه ارمنی لابیسینین پایلاشیمی سوروشولدو
"حکومت مسئوللارینا قارشی تهدیدلری یا دا قانونی یوللارلا سئچیلمیش حکومتلری دئویرمه‌یه دایر هر جور گیریشیمی هر زامان قینادیق"
آمریکا بیرلشمیش دؤولتلری خاریجی ایشلر باخانلیغی سؤزچوسو متیو میلر، آمریکا‌داکی ان بؤیوک ارمنی لابیسی آمریکا ارمنی میللی کمیته‌سینین واشینگتون ایداره‌چیسی آرام سوره‌ن هامپاریانین ارمنیستان باشباخانی نیکول پاشینیانی هدف آلان پایلاشمالارینا باغلی،
"سئچیلمیش حکومتلری ییخماغا دایر هر جور گیریشیمی هر واخت قینادیق" دئدی.
میللر، تشکیل ائتدیگی مطبوعات توپلانتیسیندا آنادولو آژانسینین، "آمریکا قانونلاری، اؤنده گلن بیر لابیچیلیک تشکیلاتینین، پتانسیل اولاراق خاریجی بیر حکومتین ییخیلماسینی و بو مقصدله سلاحلی گوجدن ایستیفاده ائدیلمه‌سینی دستکله‌یه‌ن ائیلملره گیریشمه‌سینه ایجازه وئریر می؟" سوالینی جاوابلادی.
سؤزو گئدن سوسیال مئدیا پایلاشیمینی گؤرمه‌دیگینی ایفاده ائد‌ن میلر،
"آنجاق عمومیتله بونو سؤیله‌یه‌بیلره‌م کی، حکومت مسئوللارینا قارشی تهدیدلری یا دا قانونی یوللارلا سئچیلمیش حکومتلری دئویرمه‌یه دایر هر جور گیریشیمی هر زامان قینادیق" ایفاده‌لرینی ایشلتدی.
هامپاریان، سوسیال مئدیا پلتفورمو فیسبوک‌دان ائتدیگی پایلاشیمدا، پاشینیانین قورومالارینا "پول کیفینی دوشونمکدن چوخ اوره‌گینین سسینی دینله‌یه‌رک حرکت ائتمه‌سی چاغریسی" ائتمیش، "پاشینیانی قورویان بیر ارمنینین آیلیق چکیندن چوخ، روحونا دگر وئردیگی آن" ایفاده‌لرینه یئر وئرمیشدی.
هامپاریانین پایلاشمالاری بعضی سوسیال مئدیا ایستیفاده‌چیلری طرفیندن "سوءقصد چاغریسی" اولاراق یوروملانمیشدی.
ارمنیستان‌دا اؤنجه‌کی گئجه، اقتداری زورلا اله گئچرمه گیریشیمی و باشباخان ایله حکومت عضولرینه سوءقصد ادعاسییلا ۸ نفر گؤزآلتینا آلینمیشدی.
