کرملین: تاخیل آنلاشماسی دوردورولدو
"روسیا، آنلاشمانین اوزادیلماسینا اعتراضینی بو گون تورک و اوکراینا طرفلری ایله بیرلشمیش میللتلر باش کاتیبلیگینه رسمی اولاراق بیلدیردی"
روسیا دؤولت باشقانلیغی (کرملین) سؤزچوسو دمیتری پئسکوو، قارادنیز تاخیل کوریدورو آنلاشماسینین دوردورولدوغونو، ایلگیلی شرطلر تطبیق اولوندوغون‌دا روسیانین آنلاشمایا قاییداجاغینی بیلدیردی.
پئسکوو، ژورنالیستلره وئردیگی آچیقلامادا، بو گون مدتی دولان اوکراینا و روسیادان تاخیل چیخیشینا دایر تطبیق اولونان قارادنیز تاخیل کوریدورو آنلاشماسینا باغلی بیلگی وئردی.
۱۷ جولایدا آنلاشمانین مدتینین دولدوغونا ایشاره ائد‌ن پئسکوو، "تاخیل کوریدورو آنلاشماسی فعلی اولاراق سونا چاتدی، دوردورولدو. روسیا، شرطلر تطبیق اولونار اولونماز درحال تاخیل آنلاشماسینا دؤنه‌جک. آنلاشمانین روسیا ایله ایلگیلی قیسیمی یئرینه یئتیریلمه‌دی" ایفاده‌سینی ایشلتدی.
آنلاشمانین دوردورولماسینین قیریم کؤرپوسونه سالدیرییلا باغلانتی‌سی اولمادیغینا دقت چکه‌ن پئسکوو، آنلاشمانین یئرینه یئتیریلمه‌مه‌سی حالین‌دا روسیا دؤولت باشقانی ولادیمیر پوتین طرفین‌دن بئله بیر قرارین تطبیق اولوناجاغینین داها اؤنجه‌دن بیلدیریلدیگینی خاطیرلاتدی.
روسیا خاریجی ایشلر باخانلیغی سؤزچوسو ماریا زاخارووا دا ریا خبر آژانسینا وئردیگی آچیقلامادا، "روسیا، آنلاشمانین اوزادیلماسینا اعتراضینی بو گون تورک و اوکراینا طرفلری ایله بیرلشمیش میللتلر باش کاتیبلیگینه رسمی اولاراق بیلدیردی" ایفاده‌سینی ایشلتدی.
