امریکا تورکیه-یه میننتدارلیغینی بیلدیریب

امریکا تورکیه و بیرلشمیش میللت‌لر تشکیلاتینا (بمت) قارا دنیز تاخیل دهلیزی سازیشی‌نین مدتی‌نین اوزادیلماسیندا گؤستردیک‌لری سعی‌لره گؤره میننتدارلیغینی بیلدیریب.

آغ ائوین میللی تهلوکه‌سیزلیک شوراسی‌نین ایستراتژی ایله تیشیم کووردیناتورو جان کربی گونده‌لیک مطبوعات کنفرانسیندا ژورنالیست‌لرین سوال‌لارینی جاوابلاندیریب.

قارا دنیز تاخیل دهلیزی سازیشی‌نین مدتی‌نین اوزادیلماسی ایستیقامتینده گؤستردیک‌لری سعی‌لره گؤره تورکیه و بمت-یه میننتدار اولدوق‌لارینی ایفاده ائدن کربی بونون سایه‌سینده تون‌لارلا قارغیدا‌لی داشییان گمی‌لرین محاربه سببیندن ارزاق کمبودی یاشایان آشاغی و اورتا گلیرلی اؤلکه‌لره گئده بیلدیگینه دقت چکیب.

چین دؤولت باشچی‌سی شی جین پینگی اوکراینا‌داکی هوجوم‌لارینی دایاندیرماسی اوچون روسیا پرزیدنتی ولادیمیر پوتینه فشار گؤسترمه‌یه چاغیردیق‌لارینی دئین کربی قرار وئرمه مکانیزمینده اوکراینا اولما‌دان آتشکسین مومکون اولمایاجاغینی وورغولاییب.

پوتین‌ین اؤلکه‌سی‌نین اوکراینادا غیری-قانونی ایلحاق ائتدیگی دونتسک ویلایتی‌نین ماریوپول شهرینه سفرینه توخونان جان کربی ماریوپول-ون دؤیوش میدانیندان اوزاق بیر بؤلگه اولدوغونو و پوتین‌ین بومبالادیق‌لاری شهرلره گئده‌رک ووردوق‌لاری زیانی گؤرمه‌سینه اومید ائتدیک‌لرینی بیلدیریب.

روسیانین هله ده باخموتا نظارتی اله کئچیره بیلمه‌دیگینی قئید ائدن کربی امریکانین اوکراینایا 350 میلیون دو‌لارلیق علاوه تجهیزات یاردیمی ائدجگینی بیلدیریب.