اکوادور زلزله‌سینده اؤلو ساییسی آرتدی
یئرلی مطبوعاتدا چیخان خبره گؤره، زلز‌له‌ده ان آز ۳۶۰ بینا ییخیلدی
گونئی آمریکا اؤلکه‌سی اکوادوردا ۱۸ مارس‌داکی ۶،۷ بؤیوکلوگونده‌کی زلز‌له‌ده حیاتینی ایتیره‌نلرین ساییسی ۱۴ نفره یوکسلدی.
اکوادور جمهورباشقانلیغی سایتیندان، بالاو شهرینین ۶ کیلومتر قوزئی دوغوسوندا میدانا گلن زلز‌له‌یه باغلی یاییملانان آچیقلامادا، یارالیلارینین ساییسینین ایسه ۴۴۶ نفره چیخدیغی بیلدیریلدی.
اؤلکه‌ده تیتره‌مه‌دن ان چوخ تأثیرلنن شهرلرین ال اورو ایله آزوای اولدوغو و آختارما قورتارما ایشلرینین داوام ائتدیگی قید ائدیلدی.
یئرلی مطبوعاتدا چیخان خبره گؤره، زلز‌له‌ده ان آز ۳۶۰ بینا ییخیلدی.
اکوادور دؤولت باشقانی گویللرمو لاسو، ییخیمین یاشاندیغی شهرلره گئد‌رک،
"ایشلرین سرعتلیجه باشلادیلابیلمه‌سی اوچون حکومت اولاراق لازیم اولان بوتون مالی قایناقلاری عاجیل بیر شکیلده تامین ائتدیک. زیان تعیینی ایشلری باشلادی" دئدی.
زلز‌له‌دن تأثیرلنن قونشو پرونون قوزئیینده‌کی تومبس شهرینده ده ۴ یاشینداکی بیر قیز اوشاغینین اؤلدوگو، ۷۳ نفرین ده یارالاندیغی بیلگیسی پایلاشیلدی.
اؤته یاندان لاتین آمریکا اؤلکه‌لرین‌دن برزیل، کلمبیا و شیلی‌دن وئریلن آچیقلامالاردا اکوادور ایله زلز‌له‌دن تأثیرلنن پرو خالقییلا دایانیشما وورغولاناراق، یاردیما حاضر اولدوقلاری بیلدیریلدی.
