بایدن: سون ۱۰۰ ایلین ان آغیر زلز‌له‌لردن بیریدیر
بایدن، زلز‌له‌دن آز سونرا جمهورباشقانی رجب طیب اردوغانا تلفن ائتدیگینی و آمریکانین آختارما قورتارما اکیپلری ده داخیل اولماقلا، ناتو متفیقی تورکیه‌یه تام دستگینی تکلیف ائتدیگینی سؤیله‌دی
آمریکا بیرلشمیش دؤولتلری باشقانی جو بایدن، ۶ فوریه‌ده تورکیه و سوریه‌نی ووران قهرمان ماراش مرکزلی زلز‌له‌لرین شدتینه ایشاره ائد‌رک،
"بو، سون ۱۰۰ ایلده بؤلگه‌ده باش وئره‌ن ان گوجلو زلز‌له‌لردن بیریدیر" دئدی.
بایدن، اقتصادی پلانلارینی ایضاح ائتمک اوچون سفر ائتدیگی ویسکانسین ایالتینده دانیشدی.
دانیشماسینا، آمریکا خالقینین دوشونجه‌لرینین و دعالارینین تورکیه و سوریه‌ده باش وئره‌ن زلز‌له‌لردن ضرر گؤر‌نلرله اولدوغونو سؤیله‌رک باشلایان بایدن،
"بو، سون ۱۰۰ ایلده بؤلگه‌ده باش وئره‌ن ان آغیر زلز‌له‌لردن بیریدیر" ایفاده‌سینی ایشلتدی.
جان ایتکی‌لری اوچون یاس توتدوقلارینی قید ائد‌رک، "زلزله اینانیلماز درجه‌ده گوجلو ایدی، اؤنملی آردچی تیتره‌مه‌لر و ایکینجی بیر زلزله اولدو" دئین بایدن، دۆشونجه‌لرینین بو فاجعه‌دن ائتکیلننلرله اولدوغونو سؤیله‌دی.
بایدن، زلز‌له‌دن آز سونرا جمهورباشقانی رجب طیب اردوغانا تلفن ائتدیگینی و آمریکانین آختارما قورتارما اکیپلری ده داخیل اولماقلا، ناتو متفیقی تورکیه‌یه تام دستگینی تکلیف ائتدیگینی سؤیله‌دی. باشقان بایدن، آمریکا اولوسلارآراسی قالخینما آژانسی و آوروپاداکی آمریکا اوردوسونون دا تورکیه‌ده زلزله بؤلگه‌سینده کؤمک ائتمه‌یه حاضر اولدوغونو بیلدیردی.
سوریه‌ده ده آمریکانین اینسانی یاردیم قورولوشلاری واسطه‌سی ایله زلز‌له‌دن ضرر گؤره‌نلره یاردیم ائتدیگینی بیلدیرن بایدن،
"احتیاج آنیندا تورکیه و سوریه خالقینا دستک اولماق تعهدوموزدا قرارلیییق" دئدی.
بو آرادا، آمریکا ساوونما باخانلیغی پنتاگون سؤزچوسو ژنرال پاتریک رایدر، آمریکانین، ۱۰ بؤلگه‌نی ووران قهرمان ماراش مرکزلی زلز‌له‌لرده آختارما قورتارما و اینسانی یاردیم ایشلرینه دستک اولماق اوچون اواس‌اس جورج اچ‌دابلیو بوش اوچاق گمیسینین تورکیه‌یه گؤندریلدیگینی آچیقلادی.
