ناتو روسیایا چاغیریش ائدیب

ناتو روسیانی امریکا ایله ایمضالادیغی قاره لر آراسی آتوم بالیستیک راکت ایمکان‌لارینی محدودلاش‌دیرماق مقصدی داشییان یئنی ایستراتژی سلاح‌لارین آزالدیلماسی اوزره یئنی موقاویله‌یه (ایستارت) عمل ائتمه‌یه و اؤز اراضی‌سینده یوخلاما‌لارا ایجازه وئرمه‌یه چاغیریب.

ناتو-دان وئریلن آچیقلامادا امریکا و روسیا آراسیندا قاره لر آراسی آتوم بالیستیک راکت ایمکان‌لارینی محدودلاشدیرماغی هدفله‌ین ایستارت-ین اولوسلار آراسی استقرارا تحفه وئردیگی بیلدیریلیب.

آچیقلامادا روسیانین اوزرینه گؤتوردوگو عهده لیک لری یئرینه یئتیرمه‌دیگینی قئید ائدیله‌رک "بیز روسیانی اؤز اراضی‌سینده یوخلاما‌لاری آسان‌لاش‌دیرماقلا و سازیشین ایجراچی‌سی اولان ایکی طرف‌لی مشورت کمیسیونونا  مراجعت ائتمکله سازیش اوزره عهده ‌لیک‌لرینی یئرینه یئتیرمه‌یه چاغیریریق" دئییلیب.

آچیقلامادا امریکانین راضیلاشمایا عمل ائتدیگی، یئنی ایستارت سازیشی‌نین بوتون دؤولت‌لرین میللی تهلوکه‌سیزلیک ماراق‌لارینا اویغون اولدوغو بیلدیریلیب.

قئید ائدک کی، امریکانین سووئت بیرلیگی ایله 1991-جی ایلده و روسیا فدراسیونو ایله 1993-جو ایلده ایمضالادیغی ایستراتژی سلاح‌لارین آزالدیلماسی موقاویله‌لری‌نین (ایستارت 1 و ایستارت 2) داوامی اولان یئنی ایستارت موقاویله‌سی واشینگتن و امریکا آراسیندا قوه‌ده اولان سون آتوم سازیشی‌دیر.

2010-جو ایلده ایمضالانمیش یئنی ایستارت موقاویله‌سی روسیا و امریکانین یئرلشدیردیگی ایستراتژی آتوم باش‌لیق‌لاری‌نین سایینی ماکسیموم 1550-یه قدر محدودلاشدیریر.

موقاویله همچنین بوراخیلیش و آتوم سلاحی داشییا بیلن آغیر بومباردمانچی‌لارین سایینی 800-ا قدر محدودلاشدیریر.

2011-جی ایل فوریه‌نین 5-ده قوه‌یه مینن 10 ایللیک موقاویله‌نین مدتی 2021-جی ایل فوریه‌نین 5-ده باشا چاتیب.

روسیا پرزیدنتی ولادیمیر پوتین 2021-جی ایل ژانویه‌نین 29-دا موقاویله‌نین 5 ایل مدتینه اوزادیلماسی باره‌ده قراری ایمضالاییب.

امریکا پرزیدنتی جو بایدن ده 2021-جی ایل فوریه‌نین 5-ده سازیشین مدتینی اوزاتماق قرارینی آچیقلاییب.

امریکانین خاریجی ایشلر ناظیرلیگی بو هفته روسیانین ایکی اؤلکه آراسینداکی راضیلاشمایا اساساً اؤز اراضی‌سینده یوخلاما فعالیتینه ایجازه وئرمه‌دیگینی آچیقلاییب.