چینین استخبارات بالونو آمریکانین اۆستوندن گئچدی

آمریکا بیرلشمیش دؤولتلری ساوونما باخانلیغی پنتاگون، چینیه عاید بیر یوکسک ارتفاع استخبارات بالونونون آمریکا بیرلشمیش دؤولتلری اۆزرینده اوچدوغونو و آمریکا اوردوسونون بالونو تعقیب ائتدیگینی آچیقلادی.

ژورنالیستلره آچیقلاما وئره‌ن پنتاگونون سؤزچوسو ژنرال پاتریک رایدر،

"آمریکا بیرلشمیش دؤولتلری حکومتی، آمریکا قاره‌سی اۆزرینده یوکسک ارتفاعلی گؤزتله‌مه بالونو معین ائتدی و حاضردا تعقیب ائدیلیر. قوزئی آمریکا هاوا ساوونما بؤلومو داخیل آمریکا حکومتی، بالونو یاخیندان ایزله‌ییر. یالن ایندی مۆلکی هاوا ترافیکینین چوخ اۆستونده  بیر ارتفاعدا و یئرده‌کی اینسانلار اۆچون هر هانسی بیر فیزیکی و یا حربی تهلوکه تشکیل ائتمیر" ایفاده‌لردینی ایشلتدی.

بو جور بالون حادثه‌لرینین داها اؤنجه ده باش وئردیگینی خاطیرلادان پاتریک رایدر، معین ائدیلدیکدن سونرا سؤزوگئدن بالونون استخباری بیلگیی توپلاماماسی اۆچون لازیم اولان تدبیرلری آلدیقلارینی بیلدیردی.

رایدردن سونرا ژورنالیستلره آچیقلاما وئره‌ن و آدینین آچیقلانماسینی ایسته‌مه‌یه‌ن یوکسک روتبه‌لی پنتاگون مقامی بو بیلگیلری وئردی:

"بو یوکسک یۆکسک ارتفاعلی گؤزتله‌مه بالونونون چینه عاید اولدوغوندان آرخایینیق. بیر نئچه ایل اؤنجه ده بئله بالونلار گؤرولموشدو. باشقان (جو) بایدن بو مؤوضوع ایله باغلی بیلگیلندیریلدی و حربی سئچه‌نک طلب ائتدی. (ساوونما) باخان (لوید) اوستین، فیلیپینه گئدرکن اۆست رۆتبه‌لی ساوونما یؤنه‌تیمینی توپلادی. باش قرارگاه باشقانی ژنرال مارک میلی و قوزئی آمریکا ساوونما قوموتانی ژنرال وان هرک، پارچالارین دوشه‌جگی یئرده یارانابیله‌جک ریسکلردن اؤترو بالونا سالدیرماما توصیه‌سی ائتدیلر".

بو مقام، بالونونون آمریکا بیرلشمیش دؤولتلریندن استخبارات توپلاما قابیلیتینی ضعیف اولدوغونو دگرلندیردیکلرینی بدیله گتیردی.

آمریکا بیرلشمیش دؤولتلرینین بو قونونون جدیلیگی اۆزرینه چین مقاملاری ایله ارتباطا گئچدیگینی بیلدیره‌ن پنتاگون یئتکیلیسی، بالونونون سیراغا گون آمریکا بیرلشمیش دؤولتلرینین نۆوه سلاحلارینین ساخلاندیغی مونتانا ایالتی اۆزرینده اولدوغونو، دۆشورولمه‌سی دوروموندا یئرده قالیقلارینین بؤیوک خسارته یول آچابیله‌‌جگینی سؤیله‌دی.

آمریکالی مسئول، بالونونون اؤزللیکله ده گئچیش یولونون آمریکا بیرلشمیش دؤولتلرینین حساس تاسیسلرینین اۆستو اولدوغونا دقت چکدی آنجاق استخباری بیلگی توپلاما قابیلیتینین ضعیف اولدوغونو و آمریکا اوردوسونون یئنه ده لازیم اولان تدبیرلری آلدیغینی بیلدیردی.