لولا دا سیلوا اوچونجو دفعه برزیلیا پرزیدنتی اولدو
لویس ایناسیو لولا دا سیلوا آند ایچه‌رک اوچونجو دفعه برزیلیا پرزیدنتی اولدو.
اوکتبرین 31-ده کئچیریلن پرزیدنت سئچکی‌لری‌نین ایکینجی توروندا غالیب گلن برزیلیانین سولچو کئچمیش پرزیدنتی لوئیس ایناسیو لولا دا سیلوا پارلامئنتده آند ایچیب.
سیلوا آندایچمه مراسیمینده ائتدیگی چیخیشدا برزیلیانی یئنی‌دن قوراجاغی وعدینی سؤز وئره‌رک، "آنایاسانی قورویاجاغیما، مدافعه ائدجگیمه و اونا عمل ائدجگیمه سؤز وئریرم. بوتون برزیلیا خالقی‌نین یاخشی‌لیغینی دستکلمه‌یه و بیرلیک، بوتؤولوک و موستقیل‌لیک یولو ایله گئتمه‌یه سؤز وئریرم" دئییب.
امریکا، آوروپا بیرلیگی و چین ایله آکتیو دیالوقو داوام ائتدیره‌جک‌لرینی ایفاده ائدن سیلوا اؤلکه‌ده چوخ بؤیوک اعتبارسیزلیغین اولدوغونو وورغولایا‌راق، "برزیلیا خالقی‌نین سلاحا صاحیب اولماسینی ایستمیر و بونا احتیاج دا یوخ‌دور. عدالت‌لی اؤلکه اولماق اوچون مدنیته، کیتابا گوونمک لازیمدیر. یانا‌جاق و دیگر ماتئریال‌لارین وارداتی‌نین معناسی یوخ‌دور. برزیلیا اولوسلار آراسی ایقتیصادیاتین اؤن سیرا‌لاریندا یئر آلما‌لی‌دیر" ایفاده‌لرین‌دن ایستیفاده ائدیب.
اؤلکه‌ده‌کی ایقتیصادی وضعیته ایشاره ائدن سیلوا 33 میلیون اینسانی آجلیق‌دان، 100 میلیون اینسانی ایسه یوخسوللوق‌دان خلاص ائدجگی وعدینی وئریب.
سیلوا داها سونرا پلانالتو ساراییندا اونا پرزیدنت‌لیک کمری تقدیم ائدیلدیک‌دن سونرا سارایین قارشی‌سینا توپ‌لاشان 300 مینه یاخین طرفدارینا مراجعت ائدیب.
اؤلکه‌ده برابرسیزلیگین گئتدیکجه آرتدیغینی و بونا سون قویا‌جاق‌لارینی ایفاده ائدن سیلوا "آجلیغین قاییتماسی، برزیلیا خالقینا قارشی ایشلنمیش ان بؤیوک جینایت‌دیر. گلیر، جینسیت، عیرق، ایش گوجو ساحه‌سینده، سیاسی تمثیلده، ساغلیقدا، تحصیلده و دیگر بوتون ساحه‌لرده برابرسیزلیکله موباریزه آپاراجاغیما دایر سؤز وئریرم" دئییب.
نیفرت نیتقینه سون قویماغین واختی‌نین چاتدیغینی دئین سیلوا یئنی نوع کوروناویروس اپیدمیسی زامانی 695 مین برزیلیا‌لی‌نین اؤلدوگونو خاطیرلادیب و بولسونارونون رهبرلیک ائتدیگی یئتکیلیلرین جاواب وئره‌جک‌لرینی قئید ائدیب.
قئید ائدک کی، برزیلیا-دا اوچونجو دفعه حاکمیته گلن یگانه دؤولت باشچی‌سی اولان سیلوا 2027-جی ایله قدر بو وظیفه‌نی ایجرا ائده‌جک.
آندایچمه مراسیمینده تورکیه-دن خاریجی ایشلر ناظیری مولود چاووش اوغلو، ایسپانیا کرا‌لی دوردونجو فیلیپه، آرژانتین پرزیدنتی آلبرتو فرناندز، بولیویا پرزیدنتی لوئیس آرسه، کلمبیا پرزیدنتی وستاوو پترو، پاراگوئه پرزیدنتی ماریو عبده بنتیس، اورگوئه پرزیدنتی لوئیس لاکاله، آلمانیا پرزیدنتی فرانک والتر اشتاین مایر، پورتوقالیا پرزیدنتی مارسلو ربلو دی سوسا و دیپلوماتیک بیر چوخ دؤولت‌لرین نوماینده‌لری ایشتیراک ائدیب.
ایلگیلی‌لی خبرلر
کنگو دموکراتیک جمهوریتینده تورپاق سوروشمه‌سی نتیجه‌سینده 15 نفر اؤلوب
ایدیوفا شهری یاخینلیغینداکی لیماندا باش وئرن سوروشمه نتیجه‌سینده 15 نفر اؤلوب، 60 نفر ایتکین دوشوب
