بمت روسیانی قیناییب
آنتونیو گوترش آیریجا، روسیانی "بو بؤلگه‌لری ایلحاق ائتمک قرارینا" گؤره قیناییب.
بیرلشمیش میللت‌لر تشکیلاتی‌نین باش کاتیبی آنتونیو گوترش روسیانین اوکراینانین دونتسک، لوگانسک، خرسون و زاپوروژیه ویلایت‌لرینده کئچیردیگی رفرندوم‌لارین "حقوقی اساسی‌نین اولمادیغینی" بیلدیریب.
آنتونیو گوترش آیریجا، روسیانی "بو بؤلگه‌لری ایلحاق ائتمک قرارینا" گؤره قیناییب.
"اوکراینانین دونتسک، لوگانسک، خرسون و زاپوروژیه ویلایت‌لری‌نین ایلحاقی ایله باغلی ایستنیلن قرارین هئچ بیر حقوقی اساسی یوخ‌دور و قیناماغی حاق ائدیر"، - دئیه گوترش بمت-نین باش قرارگاهیندا ژورنالیست‌لره دئییب.
گوترش قرارین قبول ائدیلمز اولدوغونو وورغولایا‌راق دئییب کی، قرار اولوسلار آراسی توپلومون مدافعه ائتدیگی هر شئیه ضیددیر. بو، تهلوکه‌لی بیر آددیم‌دیر و گرگین‌لیگی درین‌لش‌دیره‌جک. معاصر دونیادا یئری اولمایان بیر قراردیر، قبول ائدیلمزدیر.
آنتونیو گوترش بیلدیریب کی، بیر دؤولتین اراضی‌سی‌نین دیگر دؤولت طرفیندن تهدید و یا گوج تطبیقی یولو ایله هر هانسی ایلحاقی بمت نیظامنامه‌سی و اولوسلار آراسی حقوقون پوزولماسی‌دیر.
بمت تهلوکه‌سیزلیک شوراسی‌نین بئش دایمی عضوون‌دن بیری اولان روسیانی بمت کنوانسیونونا حؤرمتله یاناشماغا دعوت ائدن باش کاتیب موسکوانی بو قراردان گئری چکیلمه‌یه چاغیریب.
روسیانین بوندان سونرا آتاجاغی مومکون آددیمین باریش اومیدلرینی داها دا تهلوکه‌یه آتاجاغینا دقت چکن آنتونیو گوترش قرارین قلوبال اقتصادیاتا، خصوصیله ده اینکیشاف ائتمکده اولان اؤلکه‌لره منفی تأثیر ائدجگینی بیلدیریب.
خاطیرلاداق کی، سپتامبرین 23-27-ده اوکراینانین روسیا یؤنوملو بولوجولرین نظارتی آلتیندا اولان قوندارما دونتسک و لوگانسک خالق جمهوریت لری ایله روسیا اردوسو طرفیندن اله کئچیریلن خرسون و زاپوروژیه بؤلگه‌لرینده روسیانین ترکیبینه داخیل اولماق اوچون رفرندوم کئچیریلیب.
بؤلگه‌لرده‌کی قوندارما سئچکی کمیسیون لاری‌نین غیری-معین معلومات‌لارینا گؤره، بو سس‌لر اساسیندا "روسیایا قوشولماق" قراری وئریلیب.
کرملین سؤزچوسو دمیتری پسکوو بو گون کرملین-ده یئنی بؤلگه‌لرین روسیانین ترکیبینه داخیل ائدیلمه‌سی ایله باغلی ایمضالانما مراسیمی‌نین کئچیریله‌جگینی آچیقلاییب.
آوروپا بیرلیگی‌نین رفرندومون کئچیریلمه‌سینه رئاکسیاسی سرت اولوب و روسیایا قارشی تیجارت قاداغا‌لارینی و روسیا نفتی‌نین ان یوکسک قیمتینی اؤزونده عکس ائتدیرن سککیزینجی تحریم پاکتی تکلیف ائدیلیب.
