ناتو-دان خبردارلیق: بو حالدا موداخیله ائدجییک!

ناتو-نون باش کاتیبی ینس استولتنبرگ صربیستان و کوزوو-نو گرگین‌لیگی آرتیرماماغا چاغیریب و ناتو-نون ثابت‌لیگی قوروماق اوچون موداخیله‌یه حاضیر اولدوغونو بیان ائدیب.

ینس استولتنبرگ ناتو-نون بلژیک-ین پایتاختی بروکسل-ده‌کی قرارگاهیندا صربیستان پرزیدنتی آلکساندر ووچیچ ایله گؤروشدن سونرا تشکیل ائدیلن بیرگه مطبوعات کنفرانسیندا کوزوو ایله صربیستان آراسیندا سون آیلارداکی گرگینلیگین آزالدیلماسینا چاغیریب.

استولتنبرگ قئید ائدیب کی، سون گون‌لر ساحه‌ده وضعیت یاخشیلاشیب و بلگراد و پریشتینا گرگینلیگین آرتماسی‌نین قارشی‌سینی آلماق اوچون مسئولیت داشیییر.

طرف‌لری تمکین‌لی اولماغا چاغیران استولتنبرگ دئییب:

"ناتو ساحه‌ده‌کی وضعیتی یاخیندان ایزلمه‌یه داوام ائدیر. KFOR  باریش قوروما میسیونوموز بیرلشمیش میللت‌لر تشکیلاتی‌نین (بمت) وئردیگی یئتکییه یؤنلیب. ثابت‌لیگ ایله باغلی تهلوکه یارانارسا، KFOR  موداخیله ائتمه‌یه حاضیردیر. KFOR  کوزوو خالقی اوچون تهلوکه‌سیز موحیط و حرکت آزادلیغینی تامین ائتمک اوچون لازیمی تدبیرلر گؤره‌جک.

استولتنبرگ صربیستان و کوزوونون فیکیر آیری‌لیق‌لارینی حل ائتمک اوچون دیالوق قورماسی‌نین واجیب‌لیگینی وورغولایا‌راق، آوروپا بیرلیگی‌نین آسانلاشدیردیغی بلگراد-پریشتینا دیالوق پروسه‌سینی دستکله‌دیک‌لرینی و طرف‌لرین بو پروسه‌ده یاپیجی اولماسی‌نین لازیم اولدوغونو بیلدیریب.

ووچیچ ایسه بیلدیریب کی، کوزوو ایله دئمک اولار کی، بوتون مسئله‌لرده فیکیر آیری‌لیغی وار:

"گرگینلیگین آرتماسی و یا هر هانسی موناقیشه احتیمالی‌نین قارشی‌سینی آلماق ایستییریک".

صربیستان لیدری ناتو-نون کوزووداکی رولونا حؤرمت ائتدیک‌لرینی و ناتو ایله امکداش‌لیغی آرتیرماق ایسته‌دیک‌لرینی ده بیلدیریب.