پوتین اؤلکهسینین اوکراینا ایله یوکسک سویهده دانیشیقلارا حاضیر اولدوغونو بیلدیریب
روسیا پرزیدنتی ولادیمیر پوتین اوکراینا ایله یوکسک سویهده دانیشیقلارا حاضیر اولدوقلارینی بیان ائدیب.
روسیا پرزیدنتی ولادیمیر پوتین اوکراینا ایله یوکسک سویهده دانیشیقلارا حاضیر اولدوقلارینی بیان ائدیب.
چین پرزیدنتی شی جین پینگ روسیالی همکاری پوتین ایله تلفون دانیشیغی آپاریب.
چین خاریجی ایشلر ناظیرلیگینین بیاناتینا گؤره، گؤروش زامانی ایکی لیدئر اوکراینا مسئلهسی ایله باغلی فیکیر موبادیلهسی آپاریب، شی جین پینگ روسیا و اوکراینانی پروبلئمی دانیشیقلار یولو ایله حل ائتمهیه چاغیریب.
تلفون دانیشیغی زامانی پوتین شی جینپینگه اوکراینا پروبلئمینین تاریخی اؤلچولری و روسیانین اوکراینانین دوغوسونداکی خصوصی حربی عملیاتلا باغلی موضعی و بولگهدهکی وضعیت بارهده معلومات وئریب.
امریکا و ناتو-نون اوزون مدتدیر روسیانین آغلاباتان تهلوکهسیزلیک ناراحاتلیقلارینا محل قویمادیغینی، عهده لیکلرینی یئرینه یئتیرمکدن ایمتینا ائتدیگینی و روسیانین استراتژی قیرمیزی خط لرینی تهدید ائدهرک دوغویا دوغرو گئنیشلنمهیه داوام ائتدیگینی بیلدیرن پوتین اوکراینا ایله یوکسک سویهده دانیشیقلارا حاضیر اولدوقلارینی بیان ائدیب.
چین دؤولت باشچیسی سویوق محاربه زهنیتیندن ایمتینا ائدیلهرک بوتون اؤلکهلرین قانونی تهلوکهسیزلیک ناراحاتلیقلارینین نظره آلیندیغی، بالانس لاشدیریلمیش، افکتیو و داواملی آوروپا تهلوکهسیزلیک مخانیزمینین موذاکیره یولو ایله یارادیلماسینین واجیبلیگینی وورغولاییب.
بیرلشمیش میللتلر تشکیلاتی (بمت) نیظامنامهسینین مقصد و پرینسیپلرینه صادق قالینماسی، بوتون اؤلکهلرین اگمنلیگی و اراضی بوتؤولوگونه حؤرمت گؤستریلمهسی بارهده چین-ین اساسلی موضعه مالیک اولدوغونا ایشاره ائدن شی جین پینگ دئییب:
"چین بیرگه، هرطرفلی و داواملی تهلوکهسیزلیک کونسپتینین ساوونماسی و مرکزینده بمت-نین اولدوغو اولوسلار آراسی سیستمی و اولوسلار آراسی حقوقا اساسلانان اولوسلار آراسی نیظامی تامین ائتمک اوچون اولوسلار آراسی توپلومون بوتون طرفلری ایله ایشلمهیه حاضیردیر".
دیگر طرفدن، کرملین سؤزچوسو دمیتری پسکوو روسیانین اوکراینا ایله دانیشیقلار آپارماق اوچون بلاروس-ون پایتاختی مینسکه بیر هئیت گؤندرمهیه حاضیر اولدوغونو بیلدیریب.
پسکوو ژورنالیستلره آچیقلاماسیندا اوکراینا پرزیدنتی ولادیمیر زلنسکینین طرف سیزلیق ایستاتوسو ایله باغلی دانیشیقلارین لهینه بیانات وئردیگینی خاطیرلادیب.
پوتینین اوکراینایا قارشی حربی عملیاتین مقصدینین بولوجو حکومتلره کؤمک ائتمک، اوکراینانی ناسیزم و میلیتاریزمدن تمیزلمک اولدوغونو دئدیگینی خاطیرلادان پسکوو بونون اصلینده نیترال وضعیتین آیریلماز ترکیب حیسهسی اولدوغونا دقت چکیب.
پسکوو “بو چرچیوه ده زلنسکینین تکلیفینه جاواب اولاراق پوتین اوکراینا نوماینده هئیتی ایله دانیشیقلار آپارماق اوچون ساوونما ناظیرلیگی، خاریجی ایشلر ناظیرلیگی و دوولت باشقانلیغی رهبرلیگی نومایندهلری سویهسینده مینسکه روسیا نوماینده هئیتی گؤندرمهیه حاضیردیر” ایفادهلردن ایستیفاده ائدیب.
قئید ائدک کی، زلنسکی روسیا ایله نیتراللیق ایستاتوسو حاقیندا دانیشماقدان چکینمهدیکلرینی و پوتینه “اؤلوملرین قارشیسینی آلماق اوچون دانیشیقلار ماساسینا اوتوراق” مئساژی چاتدیرمیشدی.