بایدن: منجه روسیا، اوکراینایا گیرهجک
"سرحده ییغدیقلاری عسگرلرین توتومو قدر بؤیوک بیر ایشه گیریشسهلر بو روسیا اوچون فاجعه اولار"
آمریکا بیرلشمیش دؤولتلری باشقانی جو بایدن، روسیانین اوکراینانی ایشغال ائدجگینی دوشوندوگونو آنجاق بونون نتیجهسینین روسیا اوچون "فاجعه" اولاجاغینی آچیقلادی.
بایدن، وظیفهسینده ۱.جی ایلینی تاماملاماسی مناسیبتی ایله آغ ائوده تشکیل ائتدیگی مطبوعات کنفرانسیندا، روسیانین اوکراینانی ایشغال ائتمهسی حالیندا داها اؤنجه هئچ قارشیلاشمادیغی قدر آغیر اقتصادی نتیجهلرله قارشیلاشاجاغینی ایفاده ائدرک بئله دانیشدی:
"اوکراینانی ایشغال ائدیب ائتمهمک روسیایا باغلی. آنجاق اوکراینایا کیچیک بیر مداخیله اولسا، بونون نتیجهلری قونوسوندا مجادله وئرمهمیز لازیمدیر. آنجاق سرحده ییغدیقلاری عسگرلرین توتومو قدر بؤیوک بیر ایشه گیریشسهلر بو روسیا اوچون فاجعه اولار. روسیا، اوکراینانی ایشغال ائتسه، اورتاقلاریمیز و متفیقلریمیزله روسیایا زیان وئرهجک جدی آددیملار آتماغا حاضیریق. بیلدیگینیز کیمی ناتو متفیقلریمیزه ده دستک وئرریک".
بایدن، اوکراینایا حاضردا ۶۰۰ میلیون دلار دگرینده عسگری مهمات گؤندردیکلرینه ایشاره ائدرک، "اوکراینایا گیرسه، روسلارین جان ایتکیسی چوخ اولار" دئیه اویاردی.
اوکراینانی ایشغال ائتمهسی حالیندا، بونون روسیا اوچون قیسا، اورتا و اوزون وعدهده جدی نتیجهلری اولاجاغینی ایفاده ائدن بایدن،
"روس بانکلاری دلارلا موباریزه ائدهبیلمهیهجک" دئدی.
بایدن، روسیا دؤولت باشقانی ولادیمیر پوتینین تام معناسییلا بیر ساواش ایستمهدیگینه دقت چکهرک، "روسیا، باتی، آمریکا و ناتونو جدی معنادا تست ائدجک. منجه اوکراینایا گیرهجک" فیکیرینی پایلاشدی.
روسیانین آنلاشما شرطلریندن بیرینین اوکراینانین ناتویا قاتیلماماسی اولدوغونو وورغولایان بایدن، "هر اؤلکهنین ایستهدیگی تشکیلاتا قاتیلما حاقی وار. آنجاق من قیسا وعدهده اوکراینانین شرطلری یئرینه یئتیریب، ناتویا قاتیلابیلهجگینی سانمیرام" دئیه دانیشدی.
ایلگیلیلی خبرلر
پاریسده عرقچیلیک و ایسلام دوشمنلیگینه قارشی اعتیراض کئچیریلیب
بوندان علاوه، 2023-جو ایلین یاییندا پولیس زوراکیلیغی نتیجهسینده اؤلن گنج ده تظاهراتدا آنیلیب