41 میلیون اینسان آجلیق تهلوکه‌سی ایله قارشی-قارشییا‌دیر

بمت-نین دونیا ارزاق پروقرامی‌نین (WFP) ایجراچی دیرکتورو دیوید بیزلی دونیا میقیاسیندا اینسانی یاردیم آلماق ایمکانی اولمایان 41 میلیون اینسانین آجلیق ریسکی آلتیندا اولدوغونو بیلدیردی.

دیوید بیزلی دونیا ارزاق پروقرامی‌نین ایجلاسیندا 4 اؤلکه‌ده قیتلیغا بنزر شرط‌لرین اولدوغونو و دونیادا 41 میلیون اینسانین آجلیق‌دان اذیت چکه بیله‌جگینی بیل‌دیره‌رک، "بو آرادا، 41 میلیون اینسان سؤزون اصل معناسیندا آجلیق تهلوکه‌سیله قارشی-قارشییا‌دیر. رقم‌لره باخسانیز، بو ساده‌جه فاجعه‌دیر، بون‌لار حقیقی آدلاری اولان گئرچک اینسان‌لاردیر. سون درجه ناراحاتام" ایفاده‌لردن ایستیفاده ائدیب.

دونیا ارزاق پروقرامی‌نین 2020-جی ایل معلومات‌لاری 43 اؤلکه‌ده تخمینن 41 میلیون اینسانین قیت‌لیق تهلوکه‌سی ایله قارشی-قارشییا اولدوغونو اورتایا قویوب.

بو معلومات‌لار موناقیشه، ایقلیم دییشیک‌لیگی و اقتصادی چتین‌لیک‌لرین آجلیغی آرتیرارکن، اساس ارزاق قیمت‌لری اوزرینده باسقی یاراتدیغینی گؤسترمیش‌دیر.

معلومات‌لار آرتان قیدا قیمت‌لری‌نین لوبنان، نیجریه، سودان، ونزوئلا و زیمبابوه کیمی اؤلکه‌لرده قیدا تهلوکه‌سیزلیگینی ده آرتیردیغینی اورتایا قویوب.

دونیا ارزاق پروقرامی بو ایل قیت‌لیق ریسکی آلتیندا اولان 139 میلیون اینسانا چاتماغی هدفلییر.

اتیوپی، ماداگاسکار، گونئی سودان و یمن-ده 584.000 اینسان اونسوز دا قیت‌لیق شرایطینده یاشاییر. دونیا ارزاق پروقرامی معلومات‌لاری دا نیجریه و بورکینا فاسوداکی وضعیتین اندیشه وئریجی اولدوغونو  گؤستریر.