دونیادا سون گونده کوروناویروسا 444 میندن چوخ یولوخما قئیده آلینیب
دونیادا سون گونده 444 مین 437 نفر کوروناویروسا یولوخوب، 9035 نفر اؤلوب.
دونیادا یئنی نوع کوروناویروسدان اؤلنلرین سایی 1 میلیون 792 مینی کئچیب. انفکسیونا یولوخانلارین سایی 82 میلیون 129 مین، ویروسدان معالیجه اولوناراق ساغالانلارین سایی دا 58 میلیون 120 میندن یوخاریدیر.
345 میندن چوخ اینسان ایتکیسی و 20 میلیونا یاخین یولوخما فاکتی اپیدمی نین مرکزی اولان امریکا-دا دسامبرین 28-ده "کووید-19" انفکسیونو سببیله خستهخانالارا یئرلشدیریلنلرین 121 مین 235 اولوب. بونون ایندییه قدر گؤرولن ان یوکسک گؤستریجی اولدوغو بیلدیریلیب. اونلاردان 22 مین 592-سی ای سی یو شعبهلرینده معالیجه آلیر. 2 دسامبردان بری خستهخانالاردا معالیجه آلان "کووید-19" خستهلرینین سایینین 100 میندن آشاغی دوشمهدیگی قئید ائدیلیب.
دیگر طرفدن، "امریکا متخصصلر چرشنبه آخشامی کلرادو ایالتینده ایلک دفعه کوروناویروسون "اینگیلتره" واریانتینا (کووید-19 ب.1.1.7) یولوخما آشکار ائدیبلر.
یولوخان شخصین تقریباً 20-29 یاش آرالیغیندا کیشی اولدوغو، اونون تجرید ائدیلدیگی بیلدیریلیب.
اپیدمی زامانی 4 مین 634 اؤلوم، 87 مین 3 یولوخما فاکتینین قئیده آلیندیغی چین-ده خستهلیکلره نظارت و اونلهمه مرکزی طرفیندن آپاریلان آراشدیرمادا "کووید-19"ون کئچن ایل ووهان شهرینده ایلک دفعه اورتایا چیخدیغی زامان یاریم میلیون اینسانا یولوخدوغو احتیمالی اولدوغو ایرهلی سورولوب. ووهان-دا 23 ژانویه تاریخیندن بری بوتون اوچوشلار، قاتارلار و اتوبوس خیدمتلری لغو ائدیلمیش، آنا یول لار باغلانمیش و شهر خاریجی دونیادان تجرید اولونموشدو. 76 گونلوک تجرید مودتینده ساکینلره مارکت آلیش-وئریشینه بئله ایجازه وئریلمهمیشدیر.
اینگیلتره-ده ایسه سون 24 ساعات عرضینده 53 مین 135 نفر کوروناویروسا یولوخوب کی، بو پاندمینین باشلاماسیندان بو یانا قئیده آلینان ان یوکسک گؤستریجیدیر.
اؤلکهده حاضیردا کوروناویروسا یولوخانلارین عمومی سایی 2 میلیون 382 مین 865 نفره چاتیب.
سون 24 ساعات عرضینده 414 نفر کوروناویروسدان حیاتینی ایتیریب. بونونلا دا حاضیردا اؤلکهده کوروناویروسدان اؤلنلرین عمومی سایی 71 مین 567 نفره چاتیب.