دونیا ساغلیق تشکیلاتی کروناویروس پاندمی سی اعلان ائتدی

یئنی کروناویروسون دونیادا یاییلماسی پاندمی (قلوبال اپیدمی) کاراکتری آلیب.

بونو ژنو-ده کئچیریلن بریفینگده دونیا ساغلیق تشکیلاتی‌نین باش دیرکتورو تدروس آدهانوم بیان ائدیب.

او دئییب: “یاخین گون‌لرده و هفته‌لرده یولوخما و اؤلوم حال‌لاری‌نین باش وئردیگی اؤلکه‌لرین سایی‌نین آرتاجاغینی گؤزلییریک. بیز بئله قناعته گلمیشیک کی، کووید-19 پاندمی کیمی خاراکتریزه ائدیله بیلر”.

یئنی کروناویروس ایلک دفعه دسامبر آییندا چین-ین ووهان شهرینده قئیده آلینیب. آوروپادا ایسه ویروس ان چوخ ایتالیادا یاییلیب. فرانسا و آلمانیادا دا کرونوویروسون یاییلماسی ایله باغلی وضعیت مرکبلشیب.

دونیا ساغلیق تشکیلاتی اپیدمی یه گؤره ژانویه نین 30-دا "عاجیل وضعیت" اعلان ائدیب.

تشکیلات ان سون 2009-جو ایلده باش قالدیران H1N1 ویروسو اوچون "پاندمی" اعلان ائتمیشدیر.