بمت میانمار حکومتینی عاجیل آددیم‌لار آتماغا چاغیردی

بیرلشمیش میللت‌لر تشکیلاتی‌نین اینسان حاق‌لاری عذره عالی کمیسری‌نین معاوینی (OHCHR) کئیت گیلمور (Kate Gilmore) آراکان مسلمان‌لاری‌نین وطنداش‌لیق ایستاتوس‌لاری‌نین تانینماسی اوچون میانمار حکومتینی عاجیل آددیم‌لار آتماغا چاغیردی.

گیلمور دونن بمت ژنو اوفی‌سینده اینسان حاق‌لاری شوراسی‌نین 41-جی ایجلاسیندا چیخیش ائتدی.

میانمار‌داکی ظلم‌دن قاچا‌راق بنگلادشه سیغینماق مجبوریتینده قالان آراکان مسلمان‌لاری‌نین قاییدیشی اوچون میانمار حکومتی ایله بمت آراسیندا ایمضا‌لانان پروتوکولون 28 می تاریخینده بیر ایل ده اوزادیلدیغینی خاطیرلا‌دان گیلمور دؤنوش‌لر اوچون میانمار-دا الوئریش‌لی شرایطین هله یارانمادیغینی بیلدیردی.

گیلمور میانمار حکومتی‌نین آراکان مسلمان‌لاری‌نین قاییدیشی اوچون لازیمی شرایطی تعمین ائتمه‌لی اولدوغونو، دؤنوش‌لرله علاقه‌دار ان تمل مسئله‌لرده هئچ بیر آددیمین آتیلمادیغینی دا وورغولادی.

میانما‌رداکی ظلم‌دن 31 آوقوست 2017-جی ایلدن اعتباراً قاچا‌راق بنگلادشه سیغینان تخمینا 730 مین اینسانین چتین شرط‌لرده یاشادیغینا دقتی چکن گیلمور: "آراکان ایالتی‌نین مرکزینده یاشایان و اکثریتی اؤلکه ایچینده دیدرگین وضعیته سالینمیش شخص‌لردن عبارت 126 مین آراکان مسلمانی‌نین وضعیتی ده عینی درجه‌ده ناراحات ائدیجی ‌دیر" دئدی.

گیلمور "میانمار حکومتی بو وضعیتی ترسینه چئویره بیلمک و آراکان‌لی مسلمان‌لاری وطن‌سیز وضعیت‌دن چیخارماق اوچون عاجیل آددیم‌لار آتا بیلر و آتما‌لی‌دیر" دئیه‌رک آراکان مسلمان‌لاری‌نین وطنداش‌لیق ایستاتوس‌لاری‌نین تانینماسی و دیدرگین دوشن‌لرین ائولرینه دؤنمه‌لری اوچون الوئریش‌لی شرط‌لرین تعمین اولونماسی‌نین واجیب‌لیگینی وورغولادی.

میانمار حکومتی‌نین اؤلکه‌دکی اینسان حاق‌لاری‌نین پوزولماسی حال‌لارینا سون وئرمه‌لی اولدوغونو قئید ائدن گیلمور آراکان مسلمان‌لارینا و دیگر ائتنیک قروپ‌لارا قارشی تؤره‌دیلن آغیر جینایت‌لرین دوزگون، شفاف، غرضسیز و تام اولا‌راق آراشدیریلماسینا، بوتون گوناهکارلارا قانونون عالی‌لیگینه گؤره لاییق اولدوق‌لاری جزا‌لار وئریلمه‌سینه چاغیردی.