ژاپون باش ناظیری شینزو آبه تهرانا سفر ائدجک

ژاپون باش ناظیری شینزو آبه، تهران سفرینده ایران ایله آمریکا آراسین‌داکی گرگینلیگین آزالدیلماسی و اورتا شرقده ثابیتلیگین تامین ائدیلمه‌سی اوچون گؤروشمه‌لر ائدجگینی سؤیله‌دی

ژاپون باش ناظیری شینزو آبه تهرانا سفر ائدجک

ژاپون باش ناظیری شینزو آبه، تهران سفرینده ایران ایله آمریکا آراسین‌داکی گرگینلیگین آزالدیلماسی و اورتا شرقده ثابیتلیگین تامین ائدیلمه‌سی اوچون گؤروشمه‌لر ائدجگینی سؤیله‌دی.

ژاپون خبر آژانسی کیودویا گؤره، ایکی گونده‌لیک ایران سفری اوچون تهرانا حرکت ائدن آبه، اؤلکه‌سین‌دن آیریلما‌دان اوّل باشکند توکیوداکی خانادا هاوالیمانیندا ژورنالیست‌لره آچیقلاما وئردی.

اورتا شرق بؤلگه‌سینده آمریکا و ایران آراسیندا داوام ائدن گرگین‌لیک سببیله ناراحات اولدوغونو ایفاده ائدن آبه، "ژاپون، بؤلگه‌ده باریش و ثابیتلیگین تامین ائدیله بیلمه‌سی اوچون بوینونا گؤتوره‌بیل‌جگی قدر رول آلماق ایستییر." دئدی.

ایران ایله آمریکا آراسین‌داکی گرگینلیگین آزالدیلماسی و اورتا شرقده ثابیتلیگین تامین ائدیلمه‌سی اوچون تهرانا سفر ائدجگینی دیله گتیرن آبه، "گرگین‌لیک‌لری آزالتماق اوچون ایران لیدرلیگیله صمیمی بیر شکیلده فیکیر موبادیله‌سینده اولماق ایستییرم." ایفاده‌سینی ایستیفاده ائتدی.

آبه‌نین تهران زیارتی، 41 ایل سونرا بیر ژاپون باش ناظیرین ایرانا ائدجگی ایلک زیارت اولا‌جاق.

سون اولا‌راق ژاپونون اسکی باش ناظیری فوکودا تاکئو، 1978ده ایرانا سفر ائتمیشدی.

آبه، تهرانا چاتدیق‌دان سونرا جمهور باشقانی حسن روحانی ایله صاباح سحر ده ایران لیدری آیئت اولله علی خامنه ایله بیر آرایا گله‌جک.

ایکی اؤلکه‌نین خاریجی ایشلر ناظیرلری‌نین ده آیری بیر گؤروشمه ائتمه‌سی گؤزلنیلیر.

باش ناظیر آبه، آمریکا باشقانی دونالد ترامپ‌ین می سونوندا ژاپونا سفرینده ایران موضوعسوندا واسیطه‌چیلیق ائتمگی تکلیف ائتمیشدی.



ایلگیلی‌لی خبرلر