نیکولاس مادورو موخالیفته "دیالوق" چاغیریشینی تکرارلادی
کاراکاسدا حیاتا کئچیریلن 2 آیری میتینگه، موخالیفت و حکومت طرفداری اولان مینلرله ونزوئلالی قاتیلیب
ونزوئلا پرزیدنتی نیکولاس مادورو باشکند کاراکاسدا کئچیریلن میتینگده موخالیفته "دیالوق" چاغیریشینی تکرار ائدرکن، اؤزونو موقتی پرزیدنت اعلان ائدن میللی مجلیس باشقانی خوان گوایدو ایسه طرفدارلارینا یئنه "کوچه" چاغیریشی ائتدی.
کاراکاسدا حیاتا کئچیریلن 2 آیری میتینگه، موخالیفت و حکومت طرفداری اولان مینلرله ونزوئلالی قاتیلیب.
حاکمیتدکی ونزوئلا بیرلشمیش سوسیالیست پارتیسینه یاناشی، سندیکالاری و غیری-حکومت تشکیلاتلارینین دستگی ایله کئچیریلن میتینگه قاتیلان پرزیدنت مادورو، بورادا ائتدیگی چیخیشیندا، "ونزوئلانین یاخشیلیغی، گلهجگی اوچون بیر موذاکیره، دیالوق و آنلاشما آختاریشی موضوعسونداکی کؤنوللولوگو و دستگینی تکرار ائدیرم." دئدی.
اوروگوائهنین باشکندی مونتئویدئودا آوروپا بیرلیگینین ده قاتیلیمی ایله بیر مدت اوّل کئچیریلن توپلانتییا ایشاره ائدن مادورو، مکزیک دولت باشقانی آندرس مانوئل لوپز اوبرادور، اوروگوائه پرزیدنتی تاباره وازکز و بولیوی دولت باشقانی اوو مورالس "بو دیالوق آختاریشیندا آسانلاشدیران و واسیطهچی اولمالاری" اوچون مراجعت ائدیب.
مادورو، همچینین آمریکا باشقانی دونالد ترامپ و کابینهسینین ونزوئلایا قارشی سالدیرقان موقعسینه سون وئرمهسی اوچون دونیاداکی دیگر دولتلردن "سس چیخارمالارینی" ایستهدی.
مادورو، نه قدر تحریم تطبیق ائدرسه ائتسین غالیب گلهجکلرینی وورغولاییب.
بیر مدت اؤنجه باش وئرن و "تخریبات" کیمی قیمتلندیردیکلری 4 بؤیوک الکتریک کسینتیسینه ده توخونان مادورو، آی سونونا دوغرو باش وئرن سون کسینتییه ایسه کولومبیا و شیلیدن کئچیریلن سایبر سالدیریلارین سبب اولدوغونو ادعا ائدیب.
مادورو، الکتریک کسینتیلری و سونرا اورتایا چیخان شبکه سو پایلاما پروبلملری ایله موباریزهیه داوام ائدهجکلرینی بیلدیردی و خالقدان صبرلی اولماسینی ایستهدی.
گوایدونون "آزادلیق عملیاتی" آدلی یئنی کوچه اعتراضلاری پلانینا دستک وئرن موخالیفلر ایسه باشکندین سوکر، بارتا، لیبرتادور و شاکاو سمتلریندن باشلادیقلاری یوروشلری ال مارقوسداکی میتینگله سون قویدو.
بورادا موخالیفلره سسلنن گوایدو، یوروشون الکتریک و سو فاصیلهلرینی اعتراض ائتمکدن داها چوخ حکومتین گئتمهسی اوچون کئچیردیگینی ایفاده ائدیب.
گوایدو، چرشنبه گونو "آزادلیق اوپراسیونو" نون یئنی فازاسینا کئچهجکلرینی سؤیلهیهرک، موخالیفلری یئنیدن اؤلکهده میتینگلر کئچیرمهیه چاغیریب.
ایلگیلیلی خبرلر
اونروا غزه زولاغینین قوزئیینه اینسانی یاردیم گؤتوروب
اونروا آتیشکسین غزه خالقینین حیاتینی خیلاص ائتمک اوچون یگانه اومید اولدوغونو وورغولاییب