ترامپ: "بو امریکا پرزیدنتینه قارشی غیری-قانونی بیر دؤولت چئوریلیشی جهدی دیر"

امریکا پرزیدنتی دونالد ترامپ فدرال تحقیقات‌لار بوروسو (FBI) و عدالت ناظیرلیگی رسمی‌لری‌نین اونو وظیفه‌دن اوزاق‌لاش‌دیرماق ایستیقامتینده دانیشیق‌لار آپاردیق‌لارینا دایر ادعا‌لارا سوسیال مئدیا‌دان "غیری-قانونی و خاین بیر داورانیش" دئیه‌رک جاواب وئردی.

دونالد ترامپ  تویتر حسابین‌دان وئردیگی آچیقلامادا، امریکانین فوکس نیوز کانا‌لی‌نین آپاریجی‌سی دان بونگینونون بو سؤزلرینی بؤلوشدو: "بو، امریکا پرزیدنتینه قارشی غیری-قانونی بیر دؤولت چئوریلیشی جهدی دیر".

ترامپ بو ایفاده‌لرین سونوندا یازدیغی "دوغرو" سؤزو ایله اونا قارشی چئوریلیش جهدی ائدیلدیگینه دایر اتهام‌لاری بیر نوع تصدیق ائتدی.

دونالد ترامپ بو مئساژی فدرال تحقیقات‌لار بوروسونین (FBI) سابیق صدر معاوینی اندرو مک کیب ین امریکانین سی بی اس تلویزیونونا وئردیگی موصاحیبه‌دن سونرا بؤلوشدو.

اندرو مک کیب 2017-جی ایلده عدالت ناظیری‌نین معاوینی راد روزنشتاین ایله ترامپین ایش بیلن اولمادیغی قناعتینه گلینیرسه، اونون وظیفه‌دن اوزاقلاشدیریلماسینی تامین ائدن آنایاسا ماده‌سی ایله باغلی بعضی حکومت عضو‌لری ایله گؤروش‌لر کئچیردیگینی ادعا ائتدی.

مک کیب:"امریکا آنایاساسی‌نین 2-جی ماده‌سینده 1967-جی ایلده ائدیلن 25-جی دییشیک‌لیکله باغلی دانیشیق‌لاردا راد منیمله دیگر حکومت رسمی‌لری‌نین نئچه‌سی‌نین بو نوع سعی دستکله‌ییب- دستک‌له‌مه‌یه‌جگینی موذاکیره ائتدی" دئدی.

روزنشتاین ایسه حاقینداکی ادعا‌لاری رد ائتدی و همین ماده‌نین دؤوریه‌یه بوراخیلماسی‌نین اساسی اولمادیغینی قئید ائتدی.

بو آرادا، امریکا سناتی‌نین عدالت کمیسیونونون جمهوریتچی سناتور لیندسی گراهام ترامپین وظیفه‌دن اوزاقلاشدیریلماسی اوچون اورتایا آتیلان ادعا‌لارلا علاقه‌دار سوروشدورما‌نین آچیلاجاغینی بیلدیریب.