بلژیک-ده حلال ات کسیمی قاداغان ائدیلدی

بلژیک-ین فلاماند بؤلگه‌سینده حلال ات کسیمینه قویولان قاداغانین ایلین اولینده قوه‌یه مینمه‌سی مسلمان و یهودی ایجما‌لاری‌نین اعتراضلارینا سبب اولدو.

بلژیک اها‌لی‌سی‌نین تخمینن 6% -نی تشکیل ائدن مسلمان و یهودی‌لر حیوان‌لارین شوکلانما‌دان و یاتیزدیریلما‌دان کسیلمه‌سینی قاداغان ائدن قرارین ایکی توپلومون دینی آزادلیق‌لارینی محدودلاشدیردیغینی و بو توپلوم لارا حؤرمت‌سیزلیک اولدوغونو بیلدیریرلر.

مسلمان‌لارین "حلال"، یهودی‌لرین ایسه "کوشر" آدلاندیردیغی کسیمه گؤره، حیوان‌لار کسیلمه‌دن اول ساغلام اولما‌لی و اونلارین شعورو یئرینده اولما‌لی‌دیر. کسیمدن اول حیوان‌لارین شوکلانماسی ایسه مسلمان و یهودی ایجما‌لاری‌نین مصرف ائتدیگی "حلال" و "کوشر" محصول‌لارین الده ائدیلمه‌سینه مانع اولور.

عادتن ایفرات ساغچی قروپ‌لار و حیوان حاق‌لاری مودافیچی‌لرین‌دن عبارت اولان قاداغا طرفدارلاری ایسه شوکلانما‌دان، و یا یاتیزدیریلما‌دان کسیلن حیوانین اذیت چکدیگینی و حقوق‌لاری‌نین پوزولدوغونو ادعا ائدیرلر.

حلال کسیمی قاداغان ائدن اؤلکه‌لر سیاهی‌سینا قوشولماق یولوندا اولان بلژیک-ین فلاماند پارلامئنتی‌نین قبول ائتدیگی قاداغا قراری‌نین اؤلکه‌نین والونیا بؤلگه‌سینده سپتامبرین 1-ده قوه‌یه مینمه‌سی گؤزلنیلیر.