کانادا سعودیه عربیستانی ایله باغلانان سلاح موقاویله‌سینی لغو ائتمک ایستیر
کانادا سودیه اربیستانی ایله باغلانان سلاح موقاویله‌سینی لغو ائتمک اوچون یول‌لار آختاریر.
کانادا باش ناظیری جاستین ترودو سعودیه عربیستانی ایله باغلادیق‌لاری 13 میلیارد دو‌لارلیق سلاح موقاویله‌سینی لغو ائتمک اوچون چیخیش یولو آختاردیق‌لارینی بیلدیردی.
سلاح موقاویله‌سی‌نین ماده لرینین موقاویله‌نی لغو ائدن، و یا ماده لرینی پوزان طرفه آغیر مسئولیت لر گتیردیگینی خاطیرلا‌دان ترودو CTV-یه وئردیگی موصاحیبه‌ده: "بو واسطه‌لری سعودیه عربیستانینا صادر ائتمه‌مه‌ین یولونو آختاریریق" دئدی.
سعودیه ژورنالیستی جمال خاشقچی‌نین اؤلدورولمه‌سیندن سونرا گوندمه گلن سلاح موقاویله‌سی ایله باغلی اکتبرین 23-ده آچیقلاما وئرن ترودو بو موقاویله‌نی دون‌دورا بیله‌جک‌لرینی بیلدیرمیشدی، لاکین بو گونه قدر بو ایستیقامتده بیر آددیم بئله آتیلمامیشدی.
موقاویله‌یه اساساً، کانادا موقاویله‌نی لغو ائدرسه، سعودیه عربیستانینا 1 میلیارد دو‌لار تضمینات اؤدمه‌لی‌دیر. کانادا حکومتی بونو اوده مه‌مه‌ین یول‌لارینی آختاریر.
ترودو حکومتی سعودیه عربیستانینا سلاح ساتیشی مسئله‌سینه گؤره فدرال پارلامئنت و اؤلکه‌دکی موخالیف قروپ‌لار طرفیندن تنقید ائدیلیر.
2014 -جی ایلده، کانادانین سابیق باش ناظیری استفان جوزف هارپرین زامانیندا اونتاریو ایالتینده قورولموش " General Dynamics Land Systems –ین اورتدیگی LAV تیپی حربی واسطه‌لری آلماق ایسته‌ین سعودیه عربیستانی ایله کانادا آراسیندا 928 واسطه‌لیک بیر ساتین آلما موقاویله‌سی باغلانمیشدی. لاکین بو حربی واسطه‌لرین ساتیشی 2015-جی ایلده حاکمیته گلن جاستین ترودو حکومتی طرفیندن تاخیره سالینمیشدی.
کانادا-دا اوزون مودت موباحیثه لره سبب اولان ساتیش دؤورون خاریجی ایشلر ناظیری استفان دیونون تشببوس‌لری ایله تصدیق ائدیلمیش و حیاتا کئچیریلمیشدی.
