سربرنیتسا قوربانلاریندان‌ داها 127 نفری دفن ائدیلدی

آوروپادا ایکینجی دونیا محاربه‌سین‌دن سونرا تؤره‌دیلن و ان بؤیوک سوی‌قیریم کیمی قبول ائدیلن سربرنیتسا فاجعه‌سینده حیاتینی ایتیرن 127 قوربانین جنازه‌سی پوتوچاری عابده مزارلیغیندا دفن ائدیلدی.

527674
سربرنیتسا قوربانلاریندان‌ داها 127 نفری دفن ائدیلدی

آوروپادا ایکینجی دونیا محاربه‌سین‌دن سونرا تؤره‌دیلن و ان بؤیوک سوی‌قیریم کیمی قبول ائدیلن سربرنیتسا فاجعه‌سینده حیاتینی ایتیرن 127 قوربانین جنازه‌سی پوتوچاری عابده مزارلیغیندا دفن ائدیلدی.

تورکین‌دن خاریجی ایشلر ناظری مؤلود چاوش‌اوغلونون تمثیل اولوندوغو مراسیمده اجتماعی-سیاسی، دین خادیم‌لری، بین‌الخلق تشکیلات‌لارین نماینده‌لری، دیپلومات‌لار و اون مین‌دن چوخ اینسان ایشتیراک ائتدی.

ایلک اولا‌راق پوتوچاری مزارلیغیندا سوی‌قیریم عابده‌سی اؤنونه اکیلیل قویولدو.

بوسنی و هرزگووین ایسلام بیرلیگی‌نین رهبری حسین کاوازویچ جنازه نامازین‌دان سونرا چیخیش ائده‌رک بئله فاجعه‌نین بیر داها یاشانماماسینی دیله‌دی.

داها سونرا آدلاری بیر بیر اوخونان سوی‌قیریمین 127 قوربانی‌نین جنازه‌سی یاخین‌لاری و اهالی‌نین ایشتیراکی ایله تورپاغا تاپشیریلدی.

بونونلا دا پوتوچاری عابده مزرلیغیندا دفن ائدیلن سوی قیریم قوربان‌لاری‌نین سایی 6 مین 504-ا چاتدی.

جنازه مراسیمین‌دن اؤنجه ایسه محاربه دؤورونده بیرلشمیش میللتلر تشکیلاتی عسگرلری‌نین بازا اولا‌راق ایستیفاده ائتدیگی کؤهنه آککومولیاتور فابریکینده آنیم تدبیری کئچیریلدی. خاریجی ایشلر ناظری مؤلود چاوش اوغلو مراسیمده ایشتیراک ائتدی.

بوردا تشکیل ائدیلن سربرنیتسا سوی‌قیریمی فوتوسرگی‌سینه باخیش کئچیردیک‌دن سونرا چاوش اوغلو خاطره کیتابینا اورک سؤزلرینی یازدی.

داها سونرا چیخیش ائدن خاریجی ایشلر ناظری وورغولادی‌کی، 21 ایل اول تؤره‌دیلن سربرنیتسا سوی‌قیریمی اینسان‌لیق لیاقتینه وورولان آغیر یارا‌دیر و بو فاجعه آوروپا تاریخینده قارا لکه‌دیر.

"بوسنیا‌لی قارداش‌لاریمیزین سربرنیتسادا یاشادیغی بو فاجعه‌نین دؤزولمز آغری‌سینی هله ده اورگیمیزده حس ائدیریک. کؤرپه اوشاغین یادداشینا حک اولان و آناسینا "عسگرلر اوشاق‌لاری کیچیک گولله ایله اؤلدورورلر، دئییل‌می آنا؟" سئوال‌ینی اونودا بیلمیریک. بیر داها بو فاجعه‌نین یاشانماماسی اوچون سربرنیتسانی اونوتمادیق، اونوتمایاجاغیق و اونوتدورمایاجاغیق دئیه مؤلود چاوش اوغلو بیلدیردی.

تورکیه‌نین قارداش بوسنی خالقینا دستک نامینه ال‌لرین‌دن گلنی ائتدیک‌لرینی دیله گتیرن چاوش اوغلو سربرنیتسانین یئنی‌دن یاشیللیغا بورونه‌جگیی، صلح و دوستلوغون آدی کیمی، یعنی گوموش کیمی پاریلدایاجاغینا اینامینی ایفاده ائتدی.

خاطیرلاداق کی، 1995-جی ایل ایی یونون 11-ده سربرنیتسادا صرب اوردو قوه‌لری 8 مین‌دن چوخ بوسنیا‌لی موسلمان‌لاری آمان‌سیزجاسینا قتله یئتیریب. قوربان‌لار بیر مزارا باسدیریلیب. ایتکی‌لری تاپماق اوچون آچیلان توپلو  مزارلاردان چیخاریلان جسدلر اوزرینده آپاریلان تدقیقات‌لاردان سونرا قوربان‌لارین شخصیتی معین‌لشدیرلیر. بون‌دان سونرا ایسه هر ایل ایی‌یونون 11-ده پوتوچاری عابده مزارلیغیندا دفن ائدیلیر.



ایلگیلی‌لی خبرلر