ناسانین اوزای آراجیندا اورحان پاموکدان آلینتی و تورک آتالار سؤزو

آمریکا اولوسال هاواچیلیق و اوزای دایره‌سینین (ناسا)، اَرَندیزه (مشترییه) گؤندردیگی اوزای آراجی لوسی‌ده، اورحان پاموکون دا سؤزلری یئر آلدی.

سپوتنیکین خبرینه گؤره، ناسا، ۱۲ ایل داوام ائد‌جک اولان ارندیز وظیفه‌سینی باشلاتدی.

ناساین ارندیزه گؤندردیگی اوزای آراجی لوسییه اینسانلیغا و حیاتا دایر اؤنملی یازارلار، بیلیم اینسانلاری و دوشونورلردن آلینتیلار ایچرن لوحه‌لر یئرلشدیریلدی. آلینتیلاردا اورحان پاموکون بیر کیتابین‌دان آلینتی و بیر تورک آتالار سؤزو ده یئر آلدی.

اورحان پاموکون قارا کیتابین‌دان آلینان آلینتی بئله:

"داها چوخ سئومک، داها چوخ گولمک، داها چوخ دوشونمک ایسته‌ییردیک. داها چوخ گؤرمک، داها چوخ آنلاماق، داها چوخ گووه‌نمک ایسته‌ییردیک. ایندی بیزدن قالانلار بو ایستکلر و بو سؤزلر. دینج‌لیک، رؤیالار، یوخو و اؤپوشلر واردی. اینسانلار، میوه‌لر، کاغیذ و قلملر ده واردی. چونکو هئچ بیر شئی حیات قدر چاشدیریجی اولابیلمز. یازی خاریج. ائوت، طبیعی، تک تسلی یازی خاریج".

لوحه‌ده، "آغاجا بالتا وورموشلار، 'ساپی من‌دن‌دیر' دئمیش" شکلین‌ده‌کی تورک آتالار سؤزونون اینگیلیزجه چئویریسینه ده یئر وئریلدی.