شیمی نوبل اؤدولو صاحبلری بللی اولدو
"گونوموزده دیز اوستو بیلگی‌سایارلاردان جیب تلفنلارینا قدر چوخ ساییدا الکترونیک آراجدا ایستیفاده اولونان لیتیوم یون باتریلر، اینسان حیاتین‌دا جیغیر آچدی"
نوبل شیمی اؤدولو بو ایل، "لیتیوم یون باتریلرین اختراع ائدیلمه‌سینه کؤمک ائدن چالیشمالاریندان اؤترو" بیلیم اینسانلاری جان ب گودایناف، م. استنلی ویتینگام و آکیرا یوشینویا وئریلدی.
سوئد کرالیت بیلیملر آکادمیسین‌دن وئریلن آچیقلامادا، ۲۰۱۹ نوبل شیمی اؤدولونون "لیتیوم یون باتری اختراع ائدیلمه‌سینه یؤنه‌لیک چالیشماسیندان اؤترو" آمریکالی جان ب. گودایناف، اینگیلیس م. استنلی ویتینگام و ژاپنلو آکیرا یوشینو آراسین‌دا بؤلوشدورولدویو قید اولوندو.
آچیقلامادا، "گونوموزده دیز اوستو بیلگی‌سایارلاردان جیب تلفنلارینا قدر چوخ ساییدا الکترونیک آراجدا ایستیفاده اولونان لیتیوم یون باتریلر، اینسان حیاتین‌دا جیغیر آچدی. بو ایلین شیمی اؤدولو قازانانلاری، چالیشمالاری ایله کابل‌سیز و فسیل یاناجاقلاردان مستقیل بیر توپلومون اساسینی قویدولار" ایفاده‌لرینه یئر وئریلدی.
اینگیلیس کیمیاگر م. استنلی ویتینگام، ۱۹۷۰لی ایللرین نفت بحرانی سیراسیندا، فسیل یاناجاقلاردان مستقیل اولاراق چالیشابیله‌جک یئنی بیر تکنولوژی آختاریشی ایچینده لیتیوم ماده‌سینین الکترونلارینی دیشا آخیتما قونوسون‌داکی بؤیوک پتانسیلینی کشف ائتدی.
لیتیوم المنتی ایله سیناقلار ائدن ویتینگام، ایلک لیتیوم باتری اختراع ائدن شخص اولدو.
آمریکالی قاتی حال فیزیکی جان ب. گودایناف، لیتیوم باتریلرین پتانسیلینی ایکی قاتینا چیخاران شرایطی یاراداراق، قوللانیمی داها راخات حالا گتیره‌ن چالیشمالارا اؤنچولوک ائتدی.
ژاپون کیمیاچی آکیرا یوشینو دا باتریلرده‌کی صاف حال‌داکی لیتیومو تامامیله چیخاریب، باتریلری یالنیز لیتیوم یون ایله چالیشابیلیر حالا گتیردی. بو اختراع، باتریلرین گئنیش ایستیفاده‌سینی ممکن حالا گتیردی.
گودایناف، ویتینگام و یوشینو، اؤدول ایله یاناشی ۹ میلیون سوئد کرونو (تخمیناً ۱ میلیون دلار) پول هدیه‌نین ده صاحبی اولدو.
ایلگیلی‌لی خبرلر
مارسین قابیغی یئرینکیندن داها قالیندیر
بیلیم اینسانلاری، مارس قابیغینین اورتالاما ۴۵ ایله ۵۶ کیلومتر قالینلیقدا اولدوغونو معین ائتدی
