ایکی تورک بیلیم آدامی داها قورور قایناغیمیز اولدو

ضرر گؤرن دی‌ان‌ای حجره‌لری‌نین اوناریمی ایله ایلگیلی مکانیزم‌لری اورتایا چیخاران چالیشماسیلا شیمی نوبل اؤدولو قازانان عزیز سانجار‌دان سونرا ایکی تورک بیلیم آدامی داها تورکیه‌نین قورور قایناغی اولدو.
آمریکانین شیکاگو شهرین‌دکی نورث وسترن اونیورسیته‌سی خسته‌خاناسی قادین دوغوم بؤلومو آنابیلم دالی باشقانی پروفسور دکتر سردار بولون و یاله اونیورسیته‌سی نوروواسکولر جراحی و اؤزل باخیم آنا بیلیم دالی باشقانی مراد گون‌ائل، طب آلانیندا اؤلکه‌نین ان سایقین قوروملاریندان‌ بیری اولان اولوسال طب آکادمیسی عضو سئچیلدی‌لر.
ایستانبول طب فاکولته‌سینی 1983.جی ایلده بیتیردیک‌دن سونرا آکادمیک تحصیلینی داوام ائتدیرمک اوچون آمریکایا گئدن سردار بولون، بورادا، دونیادا تخمینا 200 میلیون قادینین اذیت چئکدیگی ائندومتریوزیس خسته‌لیگی‌نین معا‌لیجه‌سی اوزرینه درمان چالیشمالاری آپاریر.
ایستانبول چاپا طب فاکولته‌سینی بیتیردیک‌دن سونرا 1991.جو ایلده آمریکایا گئده‌رک علمی ایشلرینی بورادا داوام ائتدیرن موراد گون‌ائل ایسه، مولکولر ژنتیک، بئیین قاناما‌لاری و دامار تیخانما‌لاری قونوسوندا یوکسک اوزمانلیق یاپدی.
گون‌ائل، داها اؤنجه ده آمریکا ساغلیق باخانلیغی طرفین‌دن وئریلن اولوسال ساغلیق انستیتوسو بؤیوک آراشدیرما اؤدولونو قازانمیشدی.
یاله اونیورسیته‌سینده نوروواسکولر جراحی و اؤزل باخیم آنا بیلیم دالی باشقانی اولان گون‌ائل تورک-آمریکان طب بیرلیگی باشقان‌لیغینی دا یئریدیر.
آمریکادا تخمینا 1700 عضوو اولان اولوسال طب آکادمیسی، اؤلکه‌نین ساغلیق سیاستی و کلینیک طب اوزرینده سؤز صاحبی بیر تشکیلات اولا‌راق بیلینیر.