ایسرائیل اوْردوسو ۵۱-جی گونونده لبناندا آتشکسی ۱۱ دفعه پوْزوب
پایتاخت بیروتدا و شهرین جنۇبوندا حزباللهین قالاسؽ کیمی تانؽنان داهیهده ایسرائیل پیلوْتسوز طیارهسینین آلچاق هوندورلوکده اۇچدوغو موشاهیده ائدیلیب

ایسرائیل اوْردوسو ۵۱-جی گونونده لبناندا آتشکسی ۱۱ دفعه پوْزوب.
لبنانین NNA خبر آگئنتلیگینین وئردییی معلۇماتا گؤره، ایسرائیل اوْردوسو پایتاخت بیروت و لبنانین جنۇبونداکی ثور و نباتییه شهرلرینده بوْمباردمان، قۇرودان گیرمه، ائولری پارتلاتماق، آتش آچماق و پیلوْتسوز طیارهلر و دؤیوش طیارهلری ایله اۇچوشو کیمی پوْزونتولار حیاتا کئچیریب.
پایتاخت بیروتدا و شهرین جنۇبوندا حزباللهین قالاسؽ کیمی تانؽنان داهیهده ایسرائیل پیلوْتسوز طیارهسینین آلچاق هوندورلوکده اۇچدوغو موشاهیده ائدیلیب.
ایسرائیل اوْردوسو نباتیهنین بنت جبیل بؤلگهسیندکی آیت الشباب قصبهسینده بیر چوْخ ائوی پارتلادؽب.
رایونون مارون الراس قصبهسینده ایسرائیل اوْردوسونا مخصۇص ماشؽنلارین حرکتی موشاهیده ائدیلیب.
ایسرائیل عسگرلری قصبهدکی بیر ائوین قاپؽسینی بوْمبالاییب و آوتوْمات سیلاحلاردان آتش آچؽبلار.
مرجایون رایوْنوندا ایسرائیل اوْردوسو الطیبه قصبهسینه داخیل اوْلوب و ایسرائیل عسگرلری قصبهیه آوتوْماتیک سیلاحلاردان آتش آچؽب.
ایسرائیل اوْردوسونون بۇلدوزرلری بعضی محله و کوچهلرده یوْللاری داغؽدیب.
ایسرائیل اوْردوسونا مخصۇص پیلوْتسوز طیارلرین نباتیه و سور شهرلری اوزرینده اۇچوشو گؤرونتولنیب.
ایسرائیل اوْردوسونون ۵۱-جی گونونده لبناندا آتشکس رژیمینی ۱۱ دفعه پوْزدوغو موعیین ائدیلرکن، ۲۷ نوْیابر ۲۰۲۴-جو ایل تاریخینده آتشکس اعلان ائدیلدیکدن سوْنرا تؤرتدییی پوْزونتولارین سایؽ ۵۶۰-آ یوکسلیب.
ایسرائیلین بۇ هوجوملاری نتیجهسینده آزؽ ۳۷ نفر اؤلوب، ۴۵ نفر یارالانؽب.