روسیادا آزال اوچاغی‌نین دوشمه‌سی ایله باغلی آراشدیرما آپاریلیر
روسیا سوروشدورما کومیته‌سی آزال-آ مخصوص اوچاغین قضایا اوغراماسی ایله باغلی بوتون احتیمال‌لاری آراش‌دیرماق اوچون هرطرف‌لی تکنیکی ائکسپئرتیزا باشلادیب.
روسیا سوروشدورما کومیته‌سی "آذربایجان هاوا یول‌لاری"نا (آزال) مخصوص اوچاغین قازاخیستانین آکتائو شهری یاخینلیغیندا قضایا اوغراماسی ایله باغلی عدلی سوروشدورما باشلایاجاغینی بیلدیریب.
مؤضوع باغلی آچیقلامادا حادثه ایله باغلی سوروشدورمانین داوام ائتدیگی، آذربایجان و قازاخیستانین مووافیق قوروم‌لاری ایله قارشی‌لیق‌لی فعالیتین ده ائله‌جه، اوچاغین قارا قوتولاریندان الده ائدیلن معلومات‌لارین برزیل‌ین اوچاق قضا‌لاری‌نین تحقیقات و قارشی‌سی‌نین آلینماسی مرکزینده (SENIPA) تدقیق ائدیلدیگی بیلدیریلیب.
"حاضیردا هاوا حرکتینه نظارت خیدمت‌لری، هاوا حرکتی‌نین ایداره ائدیلمه‌سی سیستمی و هاوا هوجوموندان ساوونما سیستمی رسمی‌لرینین حرکت‌لری‌نین قیمتلندیریلمه‌سی اوچون هرطرف‌لی تکنیکی عدلی آراشدیرما آپاریلیر. بوتون مومکون سبب‌لر اؤیرنیلیر"، - آچیقلامادا دئییلیب.
خاطیرلاداق کی، دسامبرین 25-ده "آذربایجان هاوا یول‌لاری"نین J2-8243 نؤمره‌لی باکی- گروزنی سفرلرینی یئرینه یئتیرن “Embraer 190” اوچاغی آکتائو شهری‌نین یاخینلیغیندا قضایا اوغراییب. اوچاق‌دا اولان 67 نفردن 38-ی هلاک اولوب، 29 نفر ساغ قالیب.
ایلکین معلوماتا گؤره، اوچاغین روسیانین گروزنی اوزرینده‌کی هاوا مکانیندا باش وئرن فیزیکی و تکنیکی خاریجی موداخیله نتیجه‌سینده قضایا اوغراییب.
روسیا پرزیدنتی ولادیمیر پوتین آذربایجان پرزیدنتی ایلهام علی یئو ایله دانیشیب و آزال اوچاغی‌نین وورولدوغو "روسیا هاوا مکانیندا باش وئرمیش فاجعه‌وی حادثه"یه گؤره عذر ایسته‌ییب.
