گورجوستان‌دا آوروپا بیرلیگی اوچون نوماییش‌لر داوام ائدیر

گورجوستاندا حکومتین آوروپا بیرلیگی ایله دانیشیق‌لاری 2028-جی ایلین سونونا قدر تاخیره سالماسیندان سونرا باشلایان اعتراضلار داوام ائدیر. نوماییش‌لرین 12-جی گونونده آکسیاچی‌لار گئجه ساعات‌لاریندا پایتاخت تفلیس‌ده پارلمان قارشی‌سیندا توپلاندی‌لار. اؤلکه‌ده داوام ائدن اعتراض آکسیا‌لاریندا ساخلانیلان‌لارین آزادلیغا بوراخیلماسینی و پارلمان سئچکی‌لری‌نین یئنی‌دن کئچیریلمه‌سینی طلب ائدن نوماییشچی‌لر آوروپا بیرلیگی-نین گورجوستانین و موختلیف اؤلکه‌لرین بایراق‌لارینی داشییا‌راق حکومت علیهینه شعارلار سسلندیردی‌لر.

شوتا روستاولی جاده سینی نقلیات اوچون باغلایان آکسیاچی‌لار گئجه یاری‌سیندان سونرا داغیلیشماغا باشلادی‌لار.

باتومی شهرینده ده نوماییش‌لر تشکیل ائدیلدی. آوروپا پارلمانی 26 اوکتبردا گورجوستان‌دا کئچیریلن پارلمان سئچکی‌لری‌نین یئنی‌دن تشکیل اولونماسی ایله باغلی چاغیریش ائتمیش، موخالیفت و آوروپا بیرلیگی طرفداری فعال‌لار کوچه‌لره چیخا‌راق اعتراض آکسیا‌لاری کئچیرمه‌یه باشلامیشدی‌لار.

باش ناظر ایراک‌لی کوباخیدزه 28 نوامبردا وئردیگی آچیقلامادا بعضی آوروپا‌لی سیاستچی‌لرین گورجوستانین داخیلی  ایشلرینه موداخیله ائتدیگینی و آوروپا بیرلیگی پول‌لاری ایله تضییق گؤستردیک‌لرینی بیل‌دیره‌رک "بوتون بون‌لاری نظره آلا‌راق آوروپا بیرلیگی ایله دانیشیق‌لارین باشلانماسینی 2028-جی ایلین سونونا قدر گوندمه آلماماغا قرار وئردیک" ایفاده‌سینی ایشلتمیشدی.

قئید ائدک کی، کوباخیدزه اؤلکه‌سی‌نین 2030-جو ایلده آوروپا بیرلیگینه عضو اولماسی اوچون ایشلرینی داوام ائتدیرجگینی قئید ائتمیشدی.