عراقچی: سوریه‌ده باش وئرنلر، اوردونون غیر-کافی اولماسیندان قایناقلانیر

ایران‌ین خاریجی ایشلر ناظیری عباس عراقچی، سوریه‌ده باش وئرنلرین، اوردونون غیر-کافی اولماسیندان و اینکیشافین سورعتینین گؤزلنیلمز اولدوغوندان قایناقلاندیغینی بیلدیریب.

ایران دؤلت تلئویزیونوندا دانیشان عباس عراقچی سوریه‌دکی سون حادیثه‌لری دَگرلندیریب.

عراقچی ایران و سوریه کشفیات خیدمتلرینین ادلب‌دکی فعالیتدن خبردار اولدوغونو و بو بیلگیلری سوریه حؤکومتینه چاتدیردیغینی بیلدیریب، "سوریه‌ده باش وئرنلر، اوردونون غیر-کافی اولماسیندان و اینکیشافین سورعتینین گؤزلنیلمز اولدوغوندان قایناقلانیر. بشار اسد‌ ده اوردوسونون پئرفورمانسیندان شیکایتلنیب. گؤرونن اودور کی، سوریه اوردوسو روانی ساواشا تسلیم اولوب" دئدی.

سوریه اوردوسونا روحیه وئرمک، خالقلا داها چوخ دیالوق و امکداشلیق ائتمک اوچون سون گؤروشده اسده تکلیفلر وئردیکلرینی ایفاده ائدن عراقچی، "سوریه‌ده بو سون حرکتین اوغورلو اولماسینین اساس سببی سوریه اوردوسونون روحیه ایتکیسینه گؤره موقاویمت نوماییش ائتدیرمه‌مه‌سی ایدی" دئدی.

اسد حرکومتینین اؤلکه‌ده ایصلاحاتلارا گئج گئتدیگینی بیلدیرن عراقچی، "بیز حادیثه‌لری دقتله ایزله‌ییریک. سوریه‌دکی وطنداش ساواشی، اؤلکه‌نین پارچالانماسی و ایسرائیل‌ین بو وضعیت‌دن ایستیفاده ائتمه‌سیندن ناراحاتیق. دمشق‌د‌ه حؤکمرانلیق ائده‌جک شخصلرله موناسیبتلریمیزین گلجه‌یی اونلارین ایران دؤلتینه و سوریه‌دکی شیعه‌لره موناسیبتیندن، ایسرائیل و تئرور قروپلاشمالاریندان اوزاق اولماسیندان آسیلیدیر" دئدی.

ایران‌ین خاریجی ایشلر ناظیری عراقچی علاوه ائدیب کی، سوریه‌دکی سون حادیثه‌لرین حزب‌الله‌ین خوصوصی پروبلمله اوزلشمه‌سینه سبب اولاجاغینی گؤزله‌میرلر.

نوامبرین ۲۷-ده سوریه‌ده رئژیم قووه‌لری ایله موخالیف سیلاحلی قروپلار آراسیندا توققوشمالار شیدتله‌نیب.

دسامبرین ۷-ده باشکند دمشق-ه گیرمه‌یه باشلایان قروپلارا کوتله‌لرین دسته‌گی ایله رئژیم بورادا و بیر چوخ بؤلگه‌ده نظارتی تامامی ایله ایتیره‌رک سقوط ائتدی.

دونن اؤلکه‌ده بعث پارتیسینین ۶۱ ایللیک حاکیمیتی سونا چاتدیغی بیر واختدا رئژیم لیدئری بشار اسد باشکنددن قاچیب.