ایسراییل اوردوسونون غزه‌یه هوجوم‌لاریندا اؤلن‌لرین سایی آرتماقدا داوام ائدیر

ایسراییل اوردوسونون 7 اوکتبر 2023-جو ایل تاریخیندن اعتباراً غزه زولاغینا حیاتا کئچیردیگی هوجوم‌لاردا اؤلن‌لرین سایی 44 مین 612-یه یوکسلیب.

غزه‌ده فیلیسطین ساغلیق ناظیرلیگیندن وئریلن آچیقلامادا ایسراییلین غزه زولاغینا 427 گون‌دور هوجوم‌لاری ایله باغلی معلومات وئریلیب.

ایسراییل اوردوسونون غزه زولاغی‌نین موختلیف بؤلگه‌لرینده سون 24 ساعاتدا حیاتا کئچیردیگی "3 قتل عام"دا 32 نفرین حیاتینی ایتیردیگی، 95 نفرین ایسه یارالاندیغی بیلدیریلیب.

قئید ائدیلیب کی، ایسراییلین غزه زولاغینا 2023-جو ایل اوکتبرین 7-دن بو یانا حیاتا کئچیردیگی هوجوم‌لاردا اؤلن‌لرین سایی 44 مین 612، یارا‌لی‌لارین سایی ایسه 105 مین 834-ا یوکسلیب.

بیاناتدا همچنین داغینتی‌لار آلتیندا و یول کناریندا هله ده اؤلن‌لرین اولدوغو، لاکین ایسراییل قوه‌لری‌نین مانعه‌سی اوزون‌دن طبی قروپ‌لاری‌نین و سیویل ساوونما ایشچی‌لری‌نین جسدلره چاتا بیلمه‌دیگی بیر داها وورغولانیب.

دونیا ساغلیق تشکیلاتی‌نین فیلیسطین نوماینده‌سی ریک پیپرکورن بیرلشمیش میللت‌لر تشکیلاتی‌نین ژنو اوفیسی‌نین هفته‌لیک مطبوعات کونفرانسیندا آنلاین اولا‌راق ایشتیراک ائدیب و وضعیتی قیمتلندیریب.

ایسراییل اوردوسونون غزه‌نین شیمالینا قورودان هوجوم‌لاری‌نین داوام ائتدیگینی و بونون ساغلیق خیدمت‌لرینه چیخیشی انگل‌له‌دیگینی قئید ائدن ریک پیپرکورن " کمال عدوان، العوده و اندونزی خسته‌خانا‌لارینا گیریش جدی شکیلده محدودلاشدیریلیب. کریتیک طبی لوازیمات‌لار، یانا‌جاق و قان تاپیلماسیندا پروبلئم‌لرین اولدوغو بیلدیریلیر" دئییب.

ریک پیپرکورن دونیا ساغلیق تشکیلاتی‌نین غزه میسیون لارینین ایسراییلین هوجوم و موداخیله‌لریندن جدی شکیلده تاثیرلندیگینه دقت چکه‌رک، "2023-جو ایلین اوکتبری ایله 4 دسامبر 2024-جو ایل تاریخ‌لری آراسیندا دونیا ساغلیق تشکیلاتی‌نین لیدئرلیگینده غزه‌ده پلان‌لاش‌دیریلان 273 میسیونون 58 فایزی رد ائدیلدی، لغو ائدیلدی و یا بلوکلاندی" دئیه بیلدیریب.

او، غزه‌ده‌کی ان آزی 12 مین خسته‌نین ساغ قالماق اوچون طبی تخلیه‌یه احتیاجی اولدوغونو وورغولاییب.