گورجوستانین پایتاختی تفلیس‌ده اعتراض آکسیا‌لاری داوام ائدیر

گورجوستان‌دا آوروپا بیرلیگینه عضولوک موذاکیره‌لری‌نین 2028-جی ایله قدر تاخیره سالینماسینا قارشی کئچیریلن اعتراض آکسیا‌لارینا پولیس موداخیله ائدیب.

28 نوامبردا باشلایان نوماییش‌لری داوام ائتدیرن اعتیراضچی‌لار دونن گئجه پایتاخت تفلیس‌ده پارلمان بیناسی‌نین قارشی‌سیندا توپ‌لاشا‌راق حکومت علیهینه شعارلار سسلندیریب‌لر. اونلار پارلمان بیناسی‌نین قاپی‌لارینی زوراکی‌لیقلا آچماق ایستدیکده پولیس و آکسیاچی‌لار آراسیندا توققوشما باش وئریب. پولیس گؤزیاشاردیجی گاز، پلاستیک مرمی و تضییق‌لی سو ایله موداخیله ائدرکن آکسیاچی‌لار دا پولیس‌لره موختلیف اشیا‌لار آتا‌راق جاواب وئریب‌لر.

آکسیاچی‌لار طرفیندن باریکاردلار قورولا‌راق باغلانمیش کوچه پولیسین موداخیله‌سی نتیجه‌سینده آچیلیب. نوماییش‌لر زامانی بیر نئچه نفر ساخلانیلیب.

گورجوستان پرزیدنتی سالومه زورابیشویلی "ایکس"  حسابیندا پای‌لاشیم ائده‌رک تفلیس‌ده باشلایان آکسیا‌لاردا پولیسین  اعتیراضچی‌لارا موداخیله‌سینه رئاکسیا وئریب. خالقین آوروپا بیرلیگی ایله انتگراسیونا صاحیب چیخماق اوچون کوچه‌لره چیخدیغینی وورغولایان سالومه زورابیشویلی "بو، تفلیس‌ین کوچه‌لرینده روس میللت وکیل لرینین قصداً و آمانسیزجاسینا ازدیگی شئی آوروپا و آوروپا ایدئیاسی‌دیر. آییل، آوروپا" ایفاده‌لریندن ایستیفاده ائدیب.

گورجوستان باش ناظیری ایراکلی کوباخیدزه ایسه مطبوعات کنفرانسیندا اؤلکه‌سی‌نین آوروپا بیرلیگینه عضولوک موذاکیره‌لرینی 2028-جی ایله قدر تاخیره سالما قراری‌نین آوروپا انتگراسیونو پروسه‌سی‌نین دایاندیریلماسی معناسینا گلمه‌دیگینی مدافعه ائدیب. تفلیس‌ده پارلمان بیناسی‌نین اؤنونده توپ‌لاشان آکسیاچی‌لارین زوراکی‌لیق مئتودلارینا ال آتدیق‌لارینی، 50-دن چوخ پولیسین یارالاندیغینی بیلدیرن کوباخیدزه پولیس‌لری آکسیاچی‌لارا قارشی زور تطبیق ائتمک‌دن چکینمه‌یه چاغیریب.

گورجوستان داخیلی ایشلر ناظیرلیگی‌نین آچیقلاماسینا گؤره، تفلیس‌ده داوام ائدن اعتراض آکسیا‌لاریندا 107 نفر ساخلانیلیب. یئرلی مطبوعاتا گؤره، بعضی ژورنالیست‌لر و آکسیاچی‌لار اعتراضلار زامانی خسارت آلیب‌لار.