تفلیس‌ده نوماییشچی‌لر طرفیندن باغ‌لانان کوچه پولیسین موداخیله‌سی ایله آچیلیب

گورجوستانین باش ناظیری ایراکلی کوباخیدزه‌نین اؤلکه‌سی‌نین آوروپا بیرلیگینه عضو‌لوگو ایله باغلی دانیشیق‌لاری 2028-جی ایله قدر دایاندیردیقدان سونرا پایتاخت تفلیس‌ده دونن آخشام‌دان باشلایان اعتراض آکسیاسی سببیندن باغ‌لانان کوچه پولیسین موداخیله‌سی ایله آچیلیب.

ایراکلی کوباخیدزه‌نین آوروپا بیرلیگینه عضولوک دانیشیق‌لارینی 2028-جی ایله قدر دایاندیرماسی ایله باغلی گئجه ساعات‌لاریندا پارلمان بیناسی قارشی‌سیندا باشلایان اعتراض آکسیاسی بو گون سحره کیمی داوام ائدیب.

گئجه یاری‌سینا دوغرو بعضی نوماییشچی‌لر پارلمان بیناسی‌نین بیر حیسه‌سینی محاصره‌یه آلماغا جهد ائدنده پولیس ایله توققوشما باش وئریب.

تهلوکه‌سیزلیک قوه‌لری نوماییشچی‌لره تضییق‌لی سو و گؤزیاشاردیجی گاز ایله موداخیله ائدیب.

سحره یاخین نوماییشچی‌لر شوتا روستاولی کوچه‌سینده سنگرلر قورا‌راق اود یاندیرا‌راق پولیسه داش، دمیر و پلاستیک بطری لر آتماغا باشلاییب‌لار.

سحر ساعات‌لاریندا نوماییشچی‌لره موداخیله ائدن پولیس قروپ‌لاری جاده‌نی یول حرکتینه آچیب.

گورجوستان داخیلی ایشلر ناظیرلیگی بعضی نوماییشچی‌لری زوراکی‌لیق آکسیا‌لاری تشکیل ائتمکده اتهام ائده‌رک اونلاردان 43-نون ساخلانیلدیغینی، 32 پولیس امکداشی‌نین ایسه یارالاندیغینی آچیقلاییب.

گورجوستان پرزیدنتی سالومه زورابیشویلی "ایکس" حسابیندان ائتدیگی پای‌لاشیمدا نوماییشچی‌لره قارشی پولیسین موداخیله‌سینه رئاکسیا وئریب.

سالومه زورابیشویلی قئید ائدیب کی، موداخیله زامانی پولیس قروپ‌لاری نوماییشچی‌لره و ژورنالیست‌لره هوجوم ائدیب.

قئید ائدک کی، گورجوستانین باش ناظیری ایراکلی کوباخیدزه نوامبرین 28-ده "گورجو آرزوسو" پارتیاسی‌نین اوفی‌سینده کئچیردیگی بریفینقده 2028-جی ایلین سونونا قدر آوروپا بیرلیگینه عضولوک مسئله‌سینی گوندمه گتیرمه‌مه‌یه قرار وئردیک‌لرینی بیلدیریب.