باغداد: "عراقین هوجوم نقطهسی کیمی ایستیفاده اولونماسینا ایجازه وئرمهیهجییک"
عراق باش ناظیری محمد شیعه السودانی ایسراییلین "اساسسیز و ساختا" اتهاملارلا اؤلکهسینی تهدید ائتدیگینی بیلدیریب و عراقین هر هانسی هوجوم اوچون بازا کیمی ایستیفاده ائدیلمهسینه ایجازه وئرمهیهجگینی وورغولاییب.
عراق باش ناظیری محمد شیعه السودانی ایسراییلین اونلاری اساسسیز و یالان بهانهلرله تهدید ائتدیگینی، اؤلکهسینین هئچ بیر حالدا حربی هوجوملار اوچون بازا کیمی ایستیفاده ائدیلمهسینه ایجازه وئرمهیهجگینی بیان ائدیب.
باغداددا کئچیریلن تدبیرده چیخیش ائدن سودانی، بؤلگهده گرگینلیگین آرتماسینا دقت چکهرک، "صهیونیست رژیم (ایسراییل) اساسسیز و ساختا بهانهلرله بیزی تهدید ائدیر. آنجاق بیز عراقین هوجوم نقطهسی کیمی ایستیفاده اولونماسینا هئچ واخت ایجازه وئرمهیهجگیمیزی وورغولامالیییق"، – دئیه بیلدیریب.
سودانی، ایسراییلین محاربه زوناسینی گئنیشلندیرمهمهسی اوچون چاغیریش ائدهرک، عراق خاریجی ایشلر ناظیرلیگینه بو مسئلهنین اولوسلار آراسی پلتفرمالاردا دقتله ایزلنیلمهسی و موذاکیره اولونماسی بارهده گؤستریش وئردیگینی آچیقلاییب.
عراق خاریجی ایشلر ناظیری فواد حسین ایسه بیر گون اول ایسراییلدن غیر مستقیم تهدید مکتوبو آلدیقلارینی، لاکین بونون محاربه اعلان ائدیلمهسی آنلامینا گلمهدیگینی بیلدیریب.
ایسراییلین عراقداکی ایرانین دستکلدیگی شیعه میلیس قروپلارینین موضع لرینه هوجوملا تهدید ائتدیگی ادعا ائدیلیب.
دیگر طرفدن، عراقلی شیعه میلیس قروپلار زامان-زامان ایسراییل هدف لرینه هوجوملار تشکیل ائتدیکلرینی آچیقلاییبلار.
