نتانیاهو پئیجئر پارتلاییشلارینین مسئولیتی اؤز اوزرینه گؤتوروب

ایسرائیلین باش ناظیری بنیامین نتانیاهونون لبنان‌دا حزب الله عضولرینین ایستیفاده ائتدیگی پارتلایان تئلسیز و پئیجرلرین سالدیرینین ایسرائیل تهلوکه‌سیزلیک کابینه‌سین‌ده‌کی موخالیفته باخمایاراق، اونون تشببوسو ایله حیاتا کئچیریلدیگینی دئدیگی ادعا ائدیلیب.

ایسرایلین کانال 12 تلویزیونون خبرین‌ده ادعا ائدیلیب کی، ناظیرلر کابینه سینین هفته‌لیک ایجلاسین‌دا نتانیاهو سپتامبرین 17-18-ده لبنان‌دا پئیجئر و تئل‌سیزلری پارتلادان سالدیرینین مسئولیتینی اؤز اوزرینه گؤتوروب.

خبره گؤره، نتانیاهو وظیفه‌دن آلدیغی ساوونما ناظیری یواو گالانتی دولایلی گوناهلاندیراراق، «لبنان‌دا عملیات (پئیجئر و تئلسیزلرین پارتلادیلماسی) و نصر الله‌ین اؤلدورولمه‌سی تهلوکه‌سیزلیک خیدمتلرین‌ده‌کی یوکسک وظیفه‌لی مأمورلارین و اونلارا سیاسی سوییه‌ده‌کی قوروپلارینین مقاومتینه باخمایاراق حیاتا کئچیریلیب» دئدی.

نتانیاهو ناظیرلر کابینه‌سینین ایجلاسین‌دان سونرا یاییملادیغی ویدئو مئسازیندا آمریکانین یئنی سئچیلمیش پرئزیدئنتی دونالد ترامپلا سون بیر نئچه گون‌ده 3 اؤنملی گؤروشمه کئچیردیگینی بیلدیریب.

ایسرائیلین باش ناظیری نتانیاهو «بیز بوتون بیلشنلری ایله ایران تهلوکه‌سی و بونون یاراتدیغی تهدید قونوسوندا عینی فیکیردییک» دئدی.

سپتامبرین 17-18-ده لبنان‌دا حزب الله عضولرینین ایستیفاده ائتدیگی پئیجئرلرده عینی واخت‌دا پارتلاییشلار باش وئریب.

پارتلاییشلاردا ایکیسی اوشاق اولماقلا 12 نفر اؤلوب، 2323 نفر یارالانیب.

سپتامبرین 18-ده اؤلکه‌ده چوخسایلی تئلسیز پارتلاماسی نتیجه‌سین‌ده 25 نفر اؤلوب، 608-دن چوخ اینسان یارالانیب.

لبنان مقاملاری حادثه‌یه گؤره ایسرائیل مسئولیت داشیسا دا، ایسرائیل‌دن مسئله ایله باغلی هئچ بیر آچیقلاما وئریلمه‌میشدی.