ایران موسادا جاسوسلوق اتهامی ایله ۴ نفری اعدام جزاسینا محکوم ائدیب
ایران‌دا بیر محکمه، ۴ نفری اؤلکه‌نین نۆوه پروقرامینین یۆکسک وظیفه‌لی مودورلریندن اولان محسن فخری‌زاده‌نین اؤلدورولمه‌سی و ایسرائیلین استخبارات آژانسینا جاسوسلوق اتهامی ایله اعدام جزاسینا محکوم ائدیب.
غربی آذربایجان ایالتینین عدلیه‌سینین عمومی علاقه‌لر اداره‌سی ایسرائیلین خاریجی استخبارات سرویسی (موساد) ایله امکداشلیق و اؤلکه‌نین نۆوه پروقرامینین یۆکسک وظیفه‌لی مودورلریندن بیری اولان محسن فخری‌زاده‌نین قتلینده ایشتیراک دا اتهام اولوناراق ۴ نفره اعدام حؤکمو وئریب.
بو اعلاندا دئییلیر: ۲ آیری پرونده‌ده ۴ نفر صهیونیست رژیمه جاسوسلوق و موساد جاسوسلوق سرویسی ایله امکداشلیق اتهامی ایله مۆحاکیمه اولونوب و استخبارات و امنیت قوروملارینین امکداشلیغی ایله اونلارین پرونده‌سی ایالتین عمومی و انقیلاب عدلیه‌سی طرفیندن اورمیه انقیلاب محکمه‌سینه گؤندریلدی.
غربی آذربایجان ایالتی عدلیه‌سینین عمومی علاقه‌لر اداره‌سی علاوه ائدیب: انقیلاب محکمه‌سینین ۲نجی شعبه‌سی پرونده‌لره باخدیقدان سونرا 3 نفری اؤلوم جزاسینا محکوم ائدیب.
بو اعلانین باشقا بیر حیصّه‌سینده متهم‌لردن ۳-نۆن «موساد جاسوسلوق سیستئمی‌نین رهبرلیگی و دسته‌گی ایله محسن فخری‌زاده‌نین اؤلدورولمه‌سی اۆچون لوازیماتلارین اؤلکه‌نین ایچینه و ترور محلینه داشینماسیندا ایشتیراک ائتدیگی» وورغولانیر.
