السودانی، ائتلاف قووه‌لرینین عراق‌داکی ماموریتی‌نین تئزلیکله باشا چاتاجاغینی بیلدیریب
عراق‌ین باش ناظیری: اولوسلار آراسی ائتلافین عراق‌داکی ماموریتی‌نین باشا چاتماسی، حؤکومت پروقرامینین بیر حیصّه‌سیدیر
عراق‌ین باش ناظیری محمد شیاع السودانی آمریکانین رهبرلیک ائتدیگی ائتلاف قووه‌لرینین عراق‌داکی ماموریتی‌نین تئزلیکله باشا چاتاجاغینی بیلدیریب.
عراق‌ین رسمی خبر آژانسی اولان اینا، سودانی‌نین آمریکانین بلوومبئرگ تئلئویزیونو ایله موصاحیبه‌سینی پایلاشیب.
سودانی ائتلاف قووه‌لرینین عراق‌دان چیخاریلماسی ایله باغلی موذاکیره‌لره توخوناراق دئییب: "اولوسلار آراسی ائتلافین عراق‌داکی ماموریتی‌نین باشا چاتماسی، حؤکومت پروقرامینین بیر حیصّه‌سیدیر. اولسلار آراسی ائتلافین عراق‌داکی ماموریتی‌نین بیتمه تاریخینی یاخین واختلاردا آچیقلایاجاغیق. اولسلار آراسی ائتلافین مؤوجودلوغونون سببلری باشا چاتیب، اونون مؤوجودلوغونا ائحتیاج یوخدور. ۸۶ اؤلکه (عراق‌دا) ساواش مرحله‌سیندن ثابیتلشمه مرحله‌سینه کئچدی" دئدی.
تئرور تشکیلاتی داعش‌ین عراق اوچون تهلوکه یاراتمادیغینی بیلدیرن سودانی، "بوگون عراق ۲۰۱۴-جو ایلده اولدوغو کیمی دئییل. بیز عراق خالقینین فداکارلیغی و مؤقعیی، ائله‌جه‌ده اولسلار آراسی جامعه‌نین و دوستلارین دسته‌یی ایله داعشی مغلوب ائتدیک. داعش دؤلت اوچون تهلوکه یاراتمیر. عراق دگیشیب. داعش‌ین ماغارالاردا و صحرالاردا گیزله‌نن فردلری وار، بو سببدن اونون مؤوجودلوغو ثابیتلیک و امنیته تهلوکه یاراداجاق سوییه‌ده دئییل" دئدی.
آمریکا ایله علاقه‌لرین عومومی ماراقلارا و قارشیلیقلی حؤرمته اساسلاندیغینی دئین سودانی، ایران‌ین دا عراق‌داکی سیاستی دسته‌کلدی‌گینی و داعشه قارشی ساواشا عراق-ا کؤمک ائتدیگینی بیلدیریب.
عراق‌ین باش ناظیری آمریکا و ایران ایله علاقه‌لره توخوناراق، "عراق هم ایران، هم ده آمریکا ایله بیر چوخ ساحه‌لرده ایکی‌طرف‌لی علاقه‌لری اولان یئگانه اؤلکه‌دیر. بیز ایسته‌ییریک و هدفله‌ییریک کی، ایکی اؤلکه آراسینداکی موناسیبتلری داها دا یاخینلاشدیرسین" دئدی.
ایلگیلی‌لی خبرلر
پوتین، علی‌یئوله گؤروشوب
روسیه پرئزیدئنتی ولادیمیر پوتین آذربایجان پرئزیدئنتی ایلهام علی‌یئوله گؤروشوب.
